「撤回！撤回！撤回！」示威者喺軒尼詩道叫咗好幾個月嘅口號、林鄭喺記者會上否定咗無數次嘅訴求，終於喺噚日(4日)，林鄭親口喺自己部Cam前面回應港人一個過時嘅訴求－「撤回逃犯條例修訂」。

　　先唔講林鄭連講撤回都講到論論盡盡，又要事後再澄清唔係動議撤回而係宣布撤回，今時今日佢呢個遲來嘅撤回決定，Tina真係睇唔到佢可以滿足邊一邊嘅訴求。其實正如林鄭之前喺不同場合都講過，依家香港嘅動亂，已經係遠遠脫離咗逃犯條例嘅框框；我唔知係唔係林鄭一路以來所講嘅顏色革命，但更多人認同嘅感覺係，逃犯條例觸動多年來香港深層次矛盾一次過大爆發，再演變成抗爭者同警察之間仇恨加劇。依家無論黃藍綠、大中細，根本都對撤回無大感覺。

　　既然大家對撤回都係無感覺，林鄭今日先做呢個決定please唔到激進抗爭者，和理非更早已經對「壽終正寢」收貨，撤回亦唔會令到和理非覺得政府回應咗訴求，更慘嘅係一班撐警、撐政府嘅忠實支持者，有被出賣嘅感覺。

　　據聞有唔少建制派喺噚日見完林鄭之後都非常不滿，唔少覺得對暴力行為絕不妥協嘅強硬建制派，步出禮賓府更即時藐爆林鄭，話林鄭今次係出賣咗忠心嘅警隊、出賣咗建制派。有建制中人同Tina解釋，今次林鄭撤回唔能夠制止動亂之餘，仲釋出一個最壞嘅信息，就係政府所謂嘅底線係可以退，「只要夠暴力就得」，咁之後點樣止暴制亂？呢位建制中人仲話，感覺到林鄭已經章法大亂，「好打得」變成「慌失失」，建制派口裏嘅支持政府，其實都只剩下支持警方嚴正執法，日後對林鄭政府嘅任何承諾都會抱有懷疑，唔敢坐埋一條船。

　　Tina仲收到風，內地一啲對港澳事務有持份嘅人，對於林鄭撤回條例嘅決定係感到錯愕，似乎撤回修例未必係阿爺知道。如果連阿爺都唔知林鄭嘅決定的話，林鄭更可能得罪埋西邊同北邊嘅僅有支持。若然真係咁，林鄭喺禮賓府嘅日子，未必真係捱到去任期結束。

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【香港好去處】etnet全新頻道盛大推出！全港最齊盛事活動資訊盡在掌握！► 即睇