問責局改組？咁幾時問責先！？

　　講得立法會同選舉委員會多，今次轉一轉，講下政府內部架構。

　　喺梁振英年代官拜「運輸及房屋局長」嘅張炳良，接受電視台訪問時就話，當年加入政府時，係獲邀負責房屋同土地規劃政策，最終因為當時嘅泛民議員阻攔，改組失敗而改變範疇。張仲話，佢認為香港政治結構落後，問責局需要較大改組，而過程中立法會係唔應該過分介入太多行政上嘅改組。張嘅呢一番話，仲得到CY認證，喺佢嘅Facebook轉載有關報道。

 (資料圖片)

　　Tina就唔知大家對張炳良呢返講話有咩睇法，不過我個人覺得，一個政府換屆，針對唔同嘅局做工作分配，其實無可厚非。始終一啲大嘅範疇，好似教育、衛生、保安等等，一定會留返喺度，唔會亂咁合併，要郁嘅都係微調，呢一瓣就夾埋另一瓣咁，對於市民來講，真係話知你點郁，最緊要係個政府做得到嘢。

　　不過最令Tina「火滾」嘅係，問責制實施咁多年，似乎問責之風係愈吹愈無力水。想當年時任財政司司長梁錦松偷步買車，梁自己下台；沙士過後，時任衛生福利及食物局局長楊永強都因為被立法會報告批評抗疫不力，亦都黯然落台。但過去幾年，政府部門嘅差錯真係罄竹難書，但有無問責官員要為過錯落台？港鐵嘅鑊係一個接一個，頂頭嘅運房局，個個月薪幾十萬嘅仍然袋袋平安；香港教育被左中右批評到有咁爛得咁爛，但歷任一個個教育局長都好似練就金剛罩，有不死之身；再講埋政府抗疫不力，錯漏不出，陳肇始如果係內地官員的話，早就已經「人頭落地」，仲可以安坐政府總部？

　　張炳良仲講到：「無論邊個做特首，都會覺得唔好煩、盡量唔改組較好，但有時世界、環境變咗，有啲新嘅政策範疇需要人處理，令香港睇上嚟比較落後。」的而且確，世界、環境變咗，唔單止政策局要變，任何局長、高級公務員，都應該為自己所做嘅錯失負上責任，「鐵飯碗」咗咁多年，亦係時候諗下變一變。

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【你點睇？】美國總統大選在即，你認為誰將最終當選？► 立即投票