床上激戰連場 馬國明唐詩詠拍到撞爛床

　　【晴報專訊】馬國明與契妹唐詩詠在新劇《隱形戰隊》中動作戲連場，昨日二人出席拜神儀式時，透露動作戲竟然是床上大戰，詩詠更指這些愛情動作戲太激烈，令馬明「體能提升少少」，相當曖昧。

馬國明與唐詩詠十分相熟，拍床戲不會尷尬。

　　馬國明與唐詩詠昨日以新劇造型現身，詩詠笑言特地做gym應付動作戲，誰知竟是在床上發生。馬明說：「（床戰）好激，拍嗰陣唔單止撞爛床，仲拆埋窗！我哋第一日開工已經要拍呢啲戲，不過都係搞笑床戲嚟，TVB尺度都有限。」詩詠笑指床戲相當難拍：「因為要一鏡拍攝，由門口拍到去廳，跟住又入房，布景同事叫我哋唔好咁大力，又要唔好整爛嘢，又要好激情，一時主動一時被動，要好有戰略！」

詩詠否認離巢

一眾演員以劇中造型現身，陳山聰（左三）穿上全副裝備戲服。

　　除了床上戲，二人亦要應付打戲，馬明坦言身體負荷很大，加上天氣炎熱，所以相當辛苦。他說：「拍攝前期我要好似陳山聰咁着晒裝備，雖然唔使騷肌，不過我都有操少少，但當然無山聰同林子善咁嘅操肌效果。」詩詠亦特地在開拍前做gym操練體能，更練出二頭肌，她說：「其實監製無要求過，但我覺得有少少肌肉好睇啲，上次拍《超能使者》係捱住拍，今次搵健身教練幫手，發覺體能同以前比真係差好遠。」

　　另外，有傳詩詠不滿自己的四部劇集變成倉底貨，打算不與TVB續約，她笑說：「其實報道所寫嘅一樣都無發生，（劇集）一係唔出，一係就一次過出晒，命運係咁！合約問題要問公司，如果快約滿就會有人搵我，但依家仲未有人搵，合約應該未完。」

轉載自: 晴報

樂本健【年度感謝祭】維柏健及natural Factors全線2件7折► 了解詳情