《小傳日記》雖然神州聖誕氣氛淡薄，但無話唔畀送聖誕禮物。擇好日子，ＱＱ（００７００）前日喺微信小店測試「送禮」功能，肯畀錢就可以遙距做聖誕老人。　　　送禮功能喺微信小店運作，除咗珠寶同教育訓練兩大類外，其餘類別單項唔超過１００００人仔都可以成送禮佳品，順便幫襯小微企，支持民生咁話。只要小店頁面有「支持送禮物」入口，點擊「送給朋友」再課金之後，就完成送禮程序，對方收到禮物通知之後，揀「接受」再填地址，就會有專員送到面前。　　　孖屐就將今次送禮功能解讀為十年前紅包大戰嘅翻版，當年大家為咗抽紅包而集體開通微信支付，外界不禁認為ＱＱ係想複製當年嘅突襲策略。ＱＱ一直有個電商夢，但到如今遍地都係後起之秀，自己嘅電商板塊卻始終做唔起，更加唔好講同巴巴（０９９８８）、拼多多正面交鋒啦。騰訊電商業務近月以來小動作頻頻，逐啲逐啲咁踩過界。今年８月ＱＱ將「微信視訊號小店」升級為「微信小店」，「小店」正式由視頻號旗下提升為微信旗下，戰略意義明顯升級，到前日試水「送禮」功能，終於打響頭炮，試圖打造「社交＋直播＋電商」業態。　　　ＱＱ直接踩入電商就太冒進，但經「直播電商」入局，用架輕就熟嘅裝備進場，操作容易而且進退皆宜。今次送禮功能集中在「小店」，即係一批初創企業，無需要提供非常優厚嘅條款，令ＱＱ方面唔使太多投入，而從技術層面講，「送禮物」只係增加一個掣啫，喺小程序框架下嘅開發難度幾乎係零，再配合埋具天然壟斷地位嘅微信社交優勢，趁住春節送禮習俗培養消費習慣，話唔定ＱＱ今次有得搞呢，難怪同行快手（０１０２４）、巴巴同京東（０９６１８）之類腳都震埋。　　　不過又咁講，ＱＱ無論係電商板塊抑或視頻號業務，流量表現都差過競爭對手，「弱弱聯手」係咪可以產生驚人殺傷力，真係好難講。更何況，春節送禮可唔可以演變成流量大戰都係未知之數，畢竟春節大家都要登門串戶，親手送禮先夠氣氛嘛，所以一切一切都仲有待驗證，但無論點都好，今日股市行情算係ＱＱ送畀電商同行嘅一個下馬威，請請！　＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。

【你點睇？】當局料聖誕新年期間逾1300萬人次出入境，較去年同期大增。你對本港聖誕新年市道是否有信心？會否出境旅遊？► 立即投票