《小傳日記》新東方（０９９０１）隔晚出咗２０２４年首財季嘅業績報告，一眼掃過，話首財季淨利按年升咗４８％喎，營收都升咗３０﹒５％至１４億美元，符合市場預期。業績都算交到功課吖，股價應該穩陣啦？點知一開市竟走晒樣，股價低開５％後，最多挫１１％，仲創咗一年新低添！　　點解新東方股價會咁插水呢？其實關鍵就出喺第二財季嘅業績指引度。新東方話，下一季嘅預期營收按年只係升２５％至２８％，低過市場期望，所以新東方慘遭市場同大行唱淡。　　所以下次要記得，咪淨係見到當季成績好就以為「穩食冇走雞」，有喺花旗國上市嘅公司除咗會出業績之外，通常都會公布埋嚟緊一季嘅業績指引，呢份指引可以反映到公司對未來經營同行業環境嘅預期，有助投資者分析公司前景，有時仲重要過業績本身。　　正正由於業績指引不如預期，新東方都被幾間大行調低咗目標價，搞到股價跌得快過瀡滑梯。花旗仲係睇好新東方，維持「買入」評級，但因新東方短期業績指引保守，所以降目標價，但長遠來講仍然覺得新東方嘅執行力強勁；至於大和亦維持「買入」評級，但佢就認為第二季營收增長遜預期，投資者信心可能會減弱；高盛都係咁諗，話雖然對公司長期風險回報仍然有信心，但短期內面對營收壓力。　　講返新東方基本面，雖然內地此前打擊營利教培，令新東方至今仍未翻身，但公司教育新業務同比增長近５０％，非學科類輔導業務喺近６０個城市都有運作，至於附屬東方甄選（０１７９７）喺董宇輝離巢之後嘅第一份季報，就產生經營虧損，可見失去「頂流」對新東方嘅打擊都唔惹少。　　管理層話會謹慎擴張同招聘，希望喺穩健同可持續之間搵到平衡。聽落係好事，但市場聽完都係「一聽就明，二聽就懵」。睇嚟，股價要上返去，仲要等多啲好消息同反彈訊號先得，請請！　＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。

《說說心理話》身體唔舒服查唔到原因？周身痠痛疲累？可能係患有心身症！點解原生家庭會長時間影響一個人？點樣脫離循環？► 即睇