《魚缸博客》最新消息！外電引述知情人士透露，以色列和黎巴嫩真主黨接近簽署停火協議，可能在短期內由負責斡旋談判的美國總統拜登和法國總統馬克龍對外公布。　　　金價聞聲即時下跌，目前現貨金係２７美元高位回落，目前報２６２９﹒５５美元；ＷＴＩ原油都由７１美元回落到６９﹒１美元。　　　大家留意返，呢一水美法總統一齊出力斡旋，講緊係以色列同黎巴嫩真主黨「停火」而非「停戰」，更加唔係「握手言和」，根據協議，美國將幫助監督雙方暫停６０日嘅敵對行動，６０日後嘅事好難講。更何況，呢次所謂嘅「停火」協議都有好多暗湧，第一就係以色列內部就住停火問題，本身都已經好多不同聲音，即係內部不和諧；其次就係真主黨有無辦法就停火問題參與討論，如果溝通不暢咪又係開打。　　　以色列同真主黨、哈馬斯問題，博客覺得並唔係話你美國佬一句兩句話唔打就唔打；而家講和，從真主黨、哈馬斯嘅角度來講，係有更多爭取利益空間，反正呢兩個地方一路都打開仗，所謂「光腳的不怕穿鞋的」，邊個有主動話事權？打過先知。　　　所以呢一水金價油價回落，博客覺得係金股油股入手機會，反正宗教問題本身就係沒完沒了，資源股跌得越大反而要買得越兇！機會嚟喇，飛雲！　《編者按》本欄搜羅即市傳聞，惟消息未經證實，《經濟通》亦不保證內容之準確性。

【你點睇？】皇馬巴塞傳奇表演賽爆簽名會風波，26人買涉$20萬套票僅見部份球星15分鐘，你認為事件哪方須負較大責任？► 立即投票