《小傳日記》號稱對標《黑神話：悟空》嘅網易（０９９９９）旗下《燕雲十六聲》，公測時間延遲咗半年，終於話ＰＣ版１２月２７日公測啦，但之前口口聲聲承諾今年內公測嘅移動端，就要拖到明年新春先至出街，好多玩家都等到唔耐煩。　　　講起《燕雲十六聲》，就要提到佢嘅ｓｌｏｇａｎ係「３Ａ不止於３Ａ」，咁即係乜意思？３Ａ遊戲要追求高投入、高質素同高體量，整個神州到目前都只得一隻國產３Ａ遊戲，即係《黑悟空》，網易而家就話要做一款「唔止３Ａ」嘅３Ａ遊戲，頗有未學行先學飛嘅感覺。　　　《黑悟空》雖然都有缺點，但總算不負３Ａ之名，而《燕雲十六聲》就危危乎喇。幾次測試落嚟，佢所謂嘅「３Ａ不止於３Ａ」被玩家調侃成「Ａｐｐｌｅ　Ａｎｄ　Ａｎｄｒｉｏｄ」，官方宣傳話有３Ａ級嘅畫面同單機遊戲體驗，但玩家普遍認為遊戲只係一款中上水平嘅縫合怪遊戲，玩家互動部分似網易最擅長嘅ＭＭＯＲＰＧ網遊，開放世界設計就似武俠風嘅「原神」，戰鬥風格就係折磨手殘玩家嘅魂系。問題嚟啦，摻雜咁多元素嘅巨作要點樣移植到手機上面呢？運作仲可唔可以保持高品質呢？　　　而且呢個遊戲嘅受眾定位都好模糊。官方好貪心，想同時滿足單機玩家同網遊愛好者嘅需求，於是乎就搞咗個單機模式，仲話剩係玩單機都已經係一款完整嘅遊戲，就不過有公測玩家直言，單機同聯機兩種模式嘅內容大相逕庭，直情好似同時玩緊兩款完全唔同嘅遊戲咁。　　　唔知係咪為咗趕工期，有玩家發現遊戲最近一次公測有好多過場動畫居然用黑屏字幕代替，完成度低到令人髮指，有「先上車後補票」嘅嫌疑，更加唔好講卡頓呢啲問題，遊戲體驗可以話勉勉強強。　　　自從《黑悟空》樹立咗國產遊戲嘅新標桿之後，國內遊戲大廠唔好再隨隨便便用「３Ａ」做宣傳噱頭，一唔小心就會引火燒身吖！網易又的確好有壓力，現有遊戲ＩＰ表現都唔錯，但都有一段日子冇出過爆款遊戲喇。只不過要做３Ａ遊戲就一定要耐得住寂寞，同埋千金散盡還復來嘅魄力，動輒碰瓷３Ａ遊戲，到最後小心兩邊不討好，請請！　＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。

《說說心理話》心理急救II：幾個徵兆辨認身邊人需要心理支援！點樣對情緒進行急救、自我照顧？專家分享穩定情緒小練習► 即睇