當一個人無能力去改變命運時，就會選擇相信超自然力量，希望呢啲力量可以喺某一個時刻，幫助我哋扭轉命數，令我哋否極泰來，例如唔少老人年年月月向觀音上香，祈求下次輪到自己中六合彩，又例如有人會去求神問卜，喺自己屋企放滿水晶，希望眼前嘅化學結晶品，會令自己行好運，再例如，香港人會祈求香港首富「李嘉神」，即係呀誠哥，會企喺香港人一邊，揀一個香港人鍾意嘅人做特首，又會日日睇住成報、大紀元，希望佢哋會報道一啲消息，話習近平支持曾俊華。以上三樣都離不開兩個字──迷信。 

　　

　　而迷信嘅結果，大多都係令人失望。  

　

　　睇完誠哥嘅記者會，見到網上一片罵聲，亦有人去猜測誠哥用字嘅玄機，覺得佢始終會企喺香港人嘅一邊。我覺得好奇怪，你哋第一日識佢？佢係一個商人，而且係香港史上最成功嘅一位商人，最緊要就係計算利益，點樣先賺得最多，由幾時開始，佢變成為一位英雄，我哋要指望佢去打救？我見到嘅，就係一大班信徒好誠心咁向誠哥祈完禱，但跟住得個桔嘅嘢嗰種反應。 

    　　

　　其實曾經有段時間，香港人好厭惡李嘉誠，就喺大約10年前，我哋創出一個名詞「地產霸權」，形容香港嘅地產商涉足香港人衣食住行各個範疇，壟斷市場，形成霸權，李嘉誠被冠以惡魔形象，我哋甚至會將冇八號風球，歸咎係誠哥生有神力，同埋可以掌控天文台，形成「李氏力牆」。但隨著2012年誠哥支持唐英年，但最後梁振英上場、中資湧入香港投地、開舖，李嘉誠漸成Lesser Evil，甚至唔再Evil，佢嘅每一個動靜，包括從中國撤資、加重著重歐洲市場等等，都會被加諸政治意義，唔少泛民支持者亦期望呢位香港人精神Icon，會投向民主派，企喺香港人嘅一方，以至每一次誠哥嘅業績會，大家都會竪起耳仔，聽「神」嘅話語，睇吓當中有冇玄機。

  

  　今年都唔例外。首先有「女媧補天」，誠哥喺記者會被問到，支持邊位特首候選人，佢就話，中國有個神話傳說，叫「女媧補天」，希望新任特首可以好似女媧咁，解決社會撕裂問題等人為問題，佢好著重咁話「係女字邊」！「女」喎，都好明顯啦，咁大家就問係咪代表誠哥你，係支持林鄭月娥做特首？他笑笑口話「神話係女媧補天嘛」，沒有「男媧補天」，又補充一句「有都會咁講」。跟住網上就好多評論，覺得佢講嘅嘢有玄機，唔係真係支持林鄭，而係暗地裏撐曾俊華，甚至有人話，佢係講緊說話畀中聯辦聽。

　　

　　誠哥又提到，原本香港今日已經可以「一人一票」選特首，但結果香港人自己毀滅，「邊個係禍首？我見好少人責備。」有人批評誠哥支持8.31，我就話誠哥始終如一，睇返15年政改表決前，佢講過啲咩？佢係希望當時嘅政改方案能夠通過，「政制唔想成為輸家，點都要行前一步，唔好畀政制通過唔到… 」，佢當時已經強調，只要政改能夠行多一步，最低限度香港第一次能夠一人一票選特首，到時會有三個候選人讓市民選擇，「如果唔過呢，你哋駁我吖，如果唔過係有咩好處？我睇唔出。」 

  

　　李嘉誠漸成Lesser Evil，所以大家都希望佢會表態，支持今次選舉入面嘅Lesser Evil，同埋用佢喺商界嘅影響力，扭轉現時似乎已成定局嘅結果。姑勿論誠哥係咪真係企喺「民意」嗰一邊，喺今時今日，香港市場逐漸被中資瓜分嘅大環境之下，長和喺市場嘅影響力逐步縮小，李嘉誠係咪仲有咁強大嘅牙力？而在於佢自己嚟講，佢係咪真係有選擇權？呢個係更加重要嘅疑問。

  

　　個人嚟睇，全個記者會嘅重點係誠哥無端哽咽（雖然佢否認），佢話：「我愛香港，希望再見到一直引以為傲嘅香港……今日香港……GDP……得返2%」，指自己40年代嚟到香港，香港以往有活力，但今日只見大家顧住「炒樓、賺多啲、樓起高啲」，已經無理想。 

  

  　嘩，真係精彩，營造呢種上行下效、唾棄思想、鼓勵盲從、追求高樓價嘅社會氣氛，咪正正就係誠哥閣下呢一代人囉，點解今時今日，又會指責返下一代只顧炒樓？誠哥唔係一切嘅元兇，而係一整代人嘅「共業」，營造咗一套有樓至上、穩住飯碗、追夢天真嘅價值觀。有理想嘅人，哪怕只係想創立新產業，或者喺現有嘅產業鏈之下，行一條自己嘅路，喺呢套價值觀之下，都會被批評係「唔乖」、「不切實際」，被打擊得體無完膚。如果喺政治上有理想仲衰，會被唾罵阻礙社會發展。追夢，被打擊；唔追夢，被鹹魚；炒樓，被批評無理想；唔炒樓，被批評唔諗將來。我哋後生可以點呢？我哋係咪真係有得揀呢？

　

　　定還是誠哥呢段說話就係想表達，今時今日，香港人，就係無得揀？

　

　　（今屆行政長官共有三名候選人，分別為：曾俊華、林鄭月娥、胡國興）

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【你點睇？】政府擬立法規定所有的士須於車內安裝攝錄設備，你是否認同？ ► 立即投票