呢個7月真精彩啊！每個星期都有一單大嘢挑戰香港人嘅忍耐力。但係，香港人嚇大嘅，有咩新奇怪異嘅事情未見過？多啲嚟密啲手，仲有啲咩可以攞嚟刺激我哋架，一次過放晒出嚟啦？還掂你哋都有眼睇，香港人已經麻木到無晒反應架啦，認晒命架啦，我都準備好做隻港豬，出年走入西九龍，搭上高鐵運豬車，返大陸畀人擺落啲海底撈度煮，丫唔係，係食返鍋裏面煮咗廿年，煮到熟晒嘅青蛙、小白豬先啱。 

 　

　　如果你係想睇我大鬧一地兩檢喪權辱港、賣港求榮嘅忠實藍絲讀者們，恐怕要令你哋失望啦，因為今次，我思畸係要為廣大嘅中國同胞、偉大嘅中國政府抱打不平！

 　

　　都回歸二十年了，一地兩檢方案竟然對中國如此不平等，實在是港英餘毒猶存，帝國主義亡我大中國之心不死啊！明明已經是中國人的地方，竟然還要用「租賃」形式在西九設邊防，需知道當年晚清中國人是何其積弱，讓洋鬼子侵犯了我們中華民族的領土，他們就是稱呼那些地方為「租界」，現在租界復辟，還要是我們自己租自己，怎麼得了！？真是他爺爺的不公平！ 

　

　　然後啊，公安只可在內地口岸區活動，而且不可過夜，必須返大陸，隨時連拘捕個人也要給你們香港那「小資」（少資產）傳媒說三道四，不得安寧，真是煩人，幸虧我們的人民公安可以帶着槍枝警棍，看看你們這些香港人還敢不敢在國家偉大的高鐵工程裏高喊些反動的政治口號，甚麼「平反六四」、「釋放劉霞」，一喊就抓你們回大陸「好好服侍」，又或者上甚麼Facebook這些反動網站，你要入西九你就上微博吧，哈哈。

　

　　呢個一地兩檢啊，對偉大嘅中央政府真係一啲都唔公平，明明一國兩制都已經丟咗落垃圾桶，再無歷史意義，明明唔使邊境，對於一眾港共中共而言就係最合符「經濟效益」，學似田北辰話齋，真真正正「眨吓眼就入咗內地」，但而家就要為咗迎合我哋香港人嘅恐共情緒，擺個邊境喺度篤眼篤鼻。明明一地兩檢對中國就係不平等條約，香港喎，係中國地方，打橫行都得啦，做乜要咁關注你哋感受？？畀著我係大陸人，我一於罷搭高鐵啦，對中國咁唔公平。

　

　　事前大家好多討論，其實都唔相信有任何一個「一地兩檢方案」係可以符合基本法，因為，有基本法第十八條，根本冇可能可以喺香港領域行中國法律。如果一定要符合基本法，就要修改基本法，但此例一開，同樣後患無窮。當初預計最差最差，就係人大僭法。

　

　　丫點知，而家袁國強一干人等用嘅方法，就係「人大就是上帝」， 人大說：要有山，就有山。人大說：要有海，就有海。人大說：要攞返香港嘅地，香港政府就有權畀撻地中央宰割。皆因人大就是法律。港共話呢塊地唔再係香港管，呢塊地就唔再實行基本法。OK你贏囉咁，仲拗咩啫？有報道指出，根據以往人大做咗決定嘅慣例，諸如即使而家已經有市民入稟司法覆核，但香港法庭有可能係唔能夠處理一地兩檢相關司法覆核，冇架啦，米已成炊啦。 

 　

　　或者有唔少人覺得，咁就算係畀大陸攞咗塊地，咁又點？唔行一地兩檢，高鐵真係變廢鐵架喎。問題核心有兩個，第一當然係基本法盪然無存，人大話點就係點，呢套憲法已經唔再成為香港人確信兩制嘅保障。第二，就係好現實嘅問題，香港同大陸始終係行緊兩套完全唔同嘅法制，而且互不相容，將邊境淡化，會激起一大輪法律爭議，行普通法嘅香港法院未必能夠獨自處理，而可能要同行大陸法嘅內地法院「合作」，但到時會引發更多對法治嘅質疑。翁靜晶講得啱，大家好好學習中國法律啦，否則遲啲無啦啦話呢塊地係大陸嘅，你香港人歸大陸法院管啦。不過可能到時，已經再冇「香港」呢個法律管豁區，港九新界，盡歸深圳管啦。

 

　　「亲，到时淘宝全都免运费了，呵呵。」

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

《說說心理話》心理急救II：幾個徵兆辨認身邊人需要心理支援！點樣對情緒進行急救、自我照顧？專家分享穩定情緒小練習► 即睇