【公立醫院迫爆的背後】醫護人員其實仲有好多嘢要呻……

　　家陣最hit嘅話題，離唔開流感高峰期公立醫院迫爆，同埋醫護人員激心嘅新聞。人手唔夠，病床唔夠，加埋其他零零碎碎嘅擾民小事，等於煩上加煩。

 

　　話說《明報》上個月尾報道公立醫院醫生閉門申訴大會上各人大吐苦水，有一樣嘢令到我呢個病人兼家屬都好有共鳴，就係打印機塞紙。

 

　　想像一下，到睇症尾聲，醫生只要打印好覆診紙及藥紙畀病人之後，就可以接住睇下一個病人，但竟然——噢！死火！打印機塞紙！

 

　　診症室內唯一可以處理呢個問題嘅，你估仲有邊個？當然係醫生自己。你只能見住佢打開個打印機前門後門整一大餐，面上表情冷靜，但內心顯然滴晒汗。搞咗一輪之後，佢好尷尬咁同你講：「唔好意思，呢部機壞咗，我要過隔離房印畀你哋。」就係咁，浪費咗寶貴嘅三五分鐘診症時間。

 

　　小問題積埋積埋，你都唔好話唔甘。

 

　　同做護士嘅朋友傾開呢件事，點知佢話：「呢啲都係小事。」

 

　　是咁的：「當時有一個急症，要趕住抽佢五六筒血送去化驗（醫生要靠化驗結果去救命），殊不知，打印要貼喺裝住血液樣本小管上的label到第六張時，個label機居然印唔出。哼！咁就畀佢一嘢撓起。你請人送住嗰五筒血驗住先？定係等整好部label機貼埋第六筒一齊送上去？救緊命㗎大佬！分開送嘅話，（運送樣本的）阿姐就要跑嚟跑去，所以往往都係整好部機先，咁就會delay化驗報告出嚟嘅時間。」朋友話，醫管局一味慳，機械損耗到某個點，點修理都係壞，真係好擾民。

 

　　佢又話，近年醫管局採購的醫療物資，質素好差，差到有可能／已經整親病人，同時妨礙佢哋救人。

 

　　例如舊年開始所用的500毫升鹽水樽，樽底用來倒吊時掛喺鹽水架上的塑膠圈，居然會斷。「呢頭幫病人set好晒吊好鹽水，轉頭個圈就爛咗，支鹽水即刻跌落地。我做咗廿年護士，真係第一次見！」佢話，呢個情況，舊年開始每兩三個月就有一單，好彩冇扑親病人，上頭只係叫佢哋唔好再用同一批鹽水。「你諗吓，畀病人見到啲物資咁嘅質素，佢哋有乜感想！」

 

　　至於已經整親病人嘅，就係一種用嚟固定鹽水針頭嘅透明薄膠布（正確嚟講，叫「靜脈注射部位敷料」）。朋友話，本來HA用開一間大廠產品，叫Tegaderm。按招標結果，呢排轉用另一間生產商，出現咗兩個問題。

 

　　第一，塊嘢唔硬淨：撕開底下的保護紙後，本來即可貼喺病人皮膚上，點知佢容易變成梅菜咁黐埋一嚿，只好開另一塊用。喺爭分奪秒嘅急救病人時刻，出啲咁嘅狀況，直頭阻住晒兼忟死人。

 

　　第二，佢黏力唔得：如果遇著急性心肌梗塞等等皮膚出汗多嘅情況，呢批有問題薄膠布固定唔到個鹽水針頭，針頭容易移位，就係咁，針頭由靜脈移到皮下，啲鹽水唔單止入唔到靜脈幫病人，仲响皮下積聚而腫脹。護士朋友話，有啲患認知障礙症嘅公公婆婆，會拉扯鹽水針頭，有問題薄膠布因為黏力差，就更加容易令針頭移位，搞到啲公公婆婆入針位同附近部位腫晒。

 

　　其實，我只係問候吓呢位護士朋友兩句，佢就盡訴心中情：「講起當值時冇時間去廁所，人人都係忍。一到放工嗰刻，我試過同個同事一齊衝入廁所，然後一齊嗌：Get set. Ready. Go!——大家一齊痾，睇邊個痾得多，聽起嚟好好笑，係咪？」佢隨即大笑三聲，之後，係我哋兩個唔知講乜好嘅沉默。

 

　　我諗起佢為佢嘅事業進修又進修，又諗起之前我或者屋企人响公立醫院遇上那些好醫生、好護士、好職員，真係要講句：HA以至政府各位揸fit人，人才唔係攞嚟糟蹋嘅，係要嚟珍惜嘅。呢個道理，冇理由唔明白。

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

《說說心理話》心理急救II：幾個徵兆辨認身邊人需要心理支援！點樣對情緒進行急救、自我照顧？專家分享穩定情緒小練習► 即睇