2016年立法會換屆選舉提名上周五（29日）「截飛」，今屆焦點由提名期第一日開始，已經唔係有咩人可以成功打大佬，又或者邊個大佬大意失荊州。焦點在於提倡港獨也好、自決也好，這類遠較傳統泛民邀進嘅「獨自派」，能唔能夠有機會入去立法會道一號入面，日後堂而皇之咁將港獨主張，記載喺中華人民共和國香港特別行政區立法會會議的會議紀錄之上。

　　唔知政府邊個聰明仔獻上「確認信」呢條第37計，令到今次想參選立法會的「獨自」人，就算入咗飛，都唔等於可以安心等六合彩開彩一齊叫號碼，因為佢地買咗張獎券，政府可以話你係無資格中獎，就算明知開彩你6個號碼一定會中晒，都係一蚊都無得落袋。

　　上周六（30日）「獨自派」流出第一滴血，香港民族黨召集人陳浩天被取消參選新界西直選的資格，之後民主進步黨楊繼昌，31日亦被通知提名無效。聰明仔獻得呢條第37計，而政府又當咗係上上計咁去用，證明政府早就立心要「獨自派」只可以去偷歡，入立法會就免問。

　　可以預期，個頭一開咗，一次污兩次穢，肯定會陸續有來。應該係話，所有曾經高舉「獨自」黨派或者獨立參選人，最終入到閘嘅機會係微乎其微，瘀血將會全面去清，以免留低手尾喺日後可能出現嘅法律訴訟。

　　珍盈聽聞，為「獨自派」喊嘅唔止係佢地嘅支持者，仲有一班半生熟嘅民選建制派。由建制派整體部署開始以來，都見到佢地係不求有功但求無過，背住CY呢舊負資產，保住議席總數已經係汗馬功勞。一班半生熟本身都唔係咁十拿九穩，本來泛民同「獨自派」鬼打鬼，喺比例代表制之下，半生熟都可以好易變全熟，但如果無咗「獨自派」參與呢場show，最終反而係益咗傳統泛民。唔怪之得有人話，為「獨自派」默默祈禱嘅，一直都係建制派。

*報名參選九龍西的名單有：譚國僑、梁美芬、狄志遠、游蕙禎、黃碧雲、劉小麗、蔣麗芸、李泳漢、朱韶洪、毛孟靜、黃毓民、關新偉、林依麗及吳文遠。（名單只列出排名首位參選者姓名）

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

樂本健【年度感謝祭】維柏健及natural Factors全線2件7折► 了解詳情