《Online有話兒》庫克都無新機用！新款iPhone你又換唔換？

 　　蘋果新款手機「iPhone13」終於出爐，大家好似對佢反應褒貶不一，皆因呢部新機又無咩重大更新，其次市場預期嘅嘢都無出現過，唔知你又會唔會想換機呢？不過，你想換都未必有得換，因為連蘋果CEO庫克（Tim Cook）都未有貨係手！唔通蘋果魅力真係咁強？

 

 

 

庫克都係用12Pro Max開Post，連佢都無新機用

 

　　近年好多外國政客同商人都喜歡祝賀中國佳節，好似蘋果CEO庫克係今日早上8點幾就係微博出Post：

 

 

　　不過，有網友就發現到，庫克都只係用iPhone 12 Pro Max出Post，大家留言都話「你點解唔用13嘅？」「你係咪搶唔到13啊？」「原來連你都買唔起13啊？」之類嘅留言。

 

　　事實上，內地人對蘋果嘅熱情真係有增無減，9月17日晚係各大平台開售之後，所有機款都係「秒殺」沽清，連蘋果內地官網都幾乎死死地機，開售幾個鐘都成日出現Lag機、無法支付嘅情況，最後當日內地微博熱搜第一位就係「蘋果官網崩了」，所以之前憂慮蘋果機無人搶嘅問題真係多餘啦！

 

 俄羅斯開始排隊搶機，一個排隊位值萬幾人仔？

 

　　中意蘋果手機嘅「果粉」又點止係中國人呢？連「戰鬥民族」都出現瘋狂情況，唔少俄羅斯嘅果粉都已經係賣現貨嘅電話鋪開始排隊，雖然話就話可以上網訂，呢幾年都少左人排隊，但依然有唔少人選擇「早買早享受」，就係早到發售首日就已經拎到部機係手。據外地傳媒報道，係電話鋪門外一個前小小嘅排隊位置，就價值14萬盧布（約12300人民幣），因為排隊嘅人係開始前三日已經係電話鋪門外過夜排隊。

 

　　不過蘋果大本營美國，就好似無聽到人有興趣排隊啦，遙想10幾年前iPhone起初幾代機，係美國紐約第五大道嘅旗鑑店門外，已經好多人擔定凳仔、帶埋睡袋係到排隊；如果你唔想自己牌都可以搵人排嘅，索價250美元一次，此情此景已成追憶啦。

 

先達有無得炒？市場料高水500蚊

 

（Shutterstock圖片）

 

　　過往因為蘋果手機都係香港首發，所以帶起一浪炒機潮，因為內地消費者願意用溢價四、五成甚至一倍買到新機；不過而家已經無呢支歌仔唱啦，據先達鋪主分析，雖然呢一水蘋果手機都有得炒，但大該都係最多高水500蚊左右，而且仲要係iPhone 13 Pro 及 iPhone 13 Pro Max 嘅天峰藍色、1TB容量，因為貨量唔多；而其他色款同容量，最多都係高水200至300蚊咁上下，而且炒況唔多樂觀。

 

　　唉，港股又跌，蘋果手機又無肉食，你叫咁中意炒嘢嘅香港人點算？不過遲小小如果其他鋪有現貨賣，用消費券入手，可能都叫抵玩啦！

 

撰文：李皆穎

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

《說說心理話》心理急救II：幾個徵兆辨認身邊人需要心理支援！點樣對情緒進行急救、自我照顧？專家分享穩定情緒小練習► 即睇