林鄭及三司等官員就逃犯條例，分別都出嚟面對過公眾講話。立場偏左靠右，不作多談。但係作為觀眾嘅我，每次睇完政府嘅智嚢團深思熟慮後提供嘅公關回應，真係會反問自己：究竟佢哋係眾叛親離到畀公關跣咗穫發表篇爛稿，定係高官都是這樣自我中心的呢？一路諗，一路望住高官們個樣，愈嚟愈覺得佢哋似一個人……就係返工個阿姐！

相似一：推卸責任

　　逃犯條例，由鄭若驊負責；維持社會治安，由盧偉聰及李家超負責，但大家都一樣report to同一位上司，就係林鄭月娥。林鄭幾次嘅公開講話，都係「相信負責嘅同事嘅專業決定」，聽落好似支持下屬們嘅處事手法，但實質推佢哋出嚟做「孭穫人」，意圖淡化自己嘅責任。林鄭，就猶如我阿姐一樣。雖然做嘢嗰個係薯仔（啫係我），但所有過程及決定，都係有得到佢嘅同意，先發展去下一步。但好多時假如個project有咩問題，甚至有穫要孭，阿姐都會好快手咁將我哋推到前線，畀外人鞭屍之餘仲會即時割蓆幫手踩多兩腳，保住自己嘅地位，卸膊功力深厚。

相似二：今日的我推翻昨日的我

　　個人認為面對公眾表現最差嘅官員，一定非一哥盧偉聰莫屬。盧偉聰曾經指6．12為暴動，過幾日又推翻講過嘅野，話「6．12非暴動，只係某啲人涉嫌干犯暴動罪」。彈出彈入嘅立場，同我阿姐一樣，最叻將決定改嚟改去。明明今日都仲講緊跟呢個方向去做，隔幾日又改晒成個決定。喂，大佬啊，你咁樣改嚟改去，我要重新做過架。如果你係仲未傾好或決定好，我寧願你唔好咁早要求我哋動工，時間趕都好過浪費晒我地啲心血重新做過啊！不過，我明白嘅，因為做嗰個唔係你，所以無論點彈出彈入都影響唔到你；就好似大家要發洩都係發落前線警務人員身上，大佬負責人？講完話即刻潛水啦，有責任咩？

　　除咗上述兩點，其實公司高層同政府高官仲有好多共通點。我唔想迫自己睇清「高層都是靠關係去得到高職，而非實力」呢個唔公平嘅現象，又或者「想做大佬你必需當下屬為擋箭牌」呢種無品管理方式。因為，無論你身處辦公室好，社會政治又好，能力原來真係一文不值，想要做好人就更加難以生存。生活，往往迫你變成林鄭呢類「好打得」嘅人。

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

想要獨家投資理財Tips？即Like etnet 全新Facebook專頁► 立即讚好