幾位特首候選人喺情人節開始收提名之後，一如「市場預期」，選情最嚴峻嘅係葉劉淑儀，葉太政治理念同林鄭月娥最相近，票源疊得實一實，又無非建制派願意畀提名票，真係應晒網民早前改編歌「葡萄X淑儀」，只有葡萄嘅份兒。

　　胡官胡國興同埋曾俊華比起葉劉當然係樂觀些少，兩位都開始有非建制人士公開讚賞同畀票。胡官有高教界支持，相信之後法律界都會交上提名票，但同150張都仲有唔少距離，仲要努力箍票；曾俊華呢，喺民主黨公開支持之下，相信其他有選民壓力嘅非建制派，亦會陸續畀票，以實現非建制派「Lesser Evil對Evil」嘅古怪理念。

　　至於林鄭，選情當然係一片光明。之前Tina提及過金融界全部提名票將會畀晒林鄭，據聞今個星期佢地已經陸續向林鄭交票，有消息話，林鄭團隊計過數，要取得600票以上真係毫無難度，但問題係，佢地會如之前所講，盡刮提名，還是去到某一個位就收手。

　　建制派選委圈子入面，已經盛傳好多人畀完明票之後，到投暗票時都未必一定會投畀林鄭。Tina收到風，單單係有政協身份嘅選委（未必個個都係用政協身份奪得選委位置），起碼都有20人私下透露，唔多Like林鄭今次選舉「坐定粒六」嘅姿態。其中一名政協朋友講：「我同佢私下都有啲交情，但宣布參選以來，我都未同佢單對單傾過一兩句偈，起碼都打個電話來叫我支持下，試問又點叫我真心投佢一票？」

　　政協都咁有怨氣，西環又點會唔知？西環依家有幾大炸彈要慎防爆炸，其中一項就係建制派「棄明投暗」，即係明票就係不情願咁畀票林鄭，到暗票畀晒曾俊華，令到提名票遠高於最後得票。出現呢個情況，林鄭當選亦都不見得光彩，更進一步印證西環大力干預之說。

　　西環其中一招就係組織「特擊小隊」。呢批小隊嘅最大作用，係唔會提交提名票畀林鄭，但到最後投暗票時，全數過戶畀晒林鄭，以中和「棄明投暗」一派。至於小隊人數有幾多，消息就話無從得知，要到公布提名票一刻先可以計到數，但估計唔會少過50人。

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【你點睇？】當局料聖誕新年期間逾1300萬人次出入境，較去年同期大增。你對本港聖誕新年市道是否有信心？會否出境旅遊？► 立即投票