相貓相狗的啟悟

　　朋友們都以為我是中國版吉卜賽神婆（不是神女），所以有D好趣緻嘅事情都會問我。

　

　　「我最近收養咗個仔，你睇吓佢個相。」朋友話。

　

　　「佢好容易驚慌喎，切合雞年主題，好騰雞。」我答。　

 

　　「係呀！佢一見人就躲，又唔係好肯食嘢。」

　

　　「佢眼神嚴重欠缺安全感喎，佢會唔會畀人虐待過，所以眼神慌失失，仲有D神經質。」

　

　　「啊！佢咗面肋骨凹咗，可能畀人擲過落街。」

　

　　佢嘅新仔係流浪貓。

　

　　雖然我呢方面唔係好有心得，但人有人相、貓有貓相、狗有狗相、馬有馬相。D馬評人賽前睇馬，就鍾意睇毛色、睇步法、睇汗、睇火。睇火呢招，應該幾好用，可以判斷其爆炸力。火即鬥志、衝力、老馬有火，就是指此駒有與其年齡不相襯的戰意。

　

　　相馬可以發財，相貓相狗則有啟悟。

　

　

　　貓在冷漠中偶爾顯示她的溫柔；狗就口水加熱氣地噴發他的熱情。貓既自我又自在，努力維護自己的空間，她覺得與你平起平坐；狗喜歡黏住一個人，奉他為大佬／大姊大。

　

　　所以網上流行一個段子：　

 

　　狗：主人給我吃的、住的，他真是神！　

 

　　貓：主人給我吃的、住的，我真是神！

 　

　　相貓相狗主要睇眼神、毛光、步伐及身體語言。

　

　　貓自我，冇你咁好氣。狗的眼神比較Expressive，街上的流浪狗，眼裏充滿了驚恐和自卑。那些被寵的家犬則眼神或倨傲、或嬌嗲，當然亦有濛查查、烚吓烚吓嘅。

　

　　貓普遍較機靈，又自尊心強，雖然有時嚇到全身毛聳起，但通常都「懶優雅」。有一次觀察朋友的愛貓白雪公主，她企圖由一沙發跳到另一沙發，但錯估距離，摔了下來。可是她不會立刻再試跳，她很妙曼地坐下來，細心舐著自己雪白的毛，掩飾剛才那尷尬，也Dilute一下那失敗感。

　

　　人也該學學，遇上挫折，優雅一點，不必咆哮、無謂尖叫，男的可以去推鐵；女的去美容，做完了，又是一條好漢，一方美女！

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【etnet 30周年】多重慶祝活動一浪接一浪，好禮連環賞！ ► 即睇詳情