做老細的陷阱

　　創業浪潮澎湃，好多人都可以或者夢想做老細，不過呢件事唔一定係你想像咁好玩，因為玩得唔小心，會畀人玩番轉頭！

 

 

　　上月在「香港印藝學會」晚宴上，遇上幾位中小企老闆，大家除咗啄磨印刷技術，談先燙後印或先印後燙的效果外，還研究員工關係的tricky處。

 

　　「我成日想同D員工打成一片，創造大家庭Feel，你地有乜好提議？」老闆A問。

 

　　「而家D八零九零後，你要同佢地一同呼吸、講佢所講、想佢所想、玩佢所玩先得嘅！」老闆B年紀輕D，好似好明白年青人心態。

 

　　「唉！我去上堂，D導師都係咁教。不過原來呢D衹啱大企業，用喺我地呢D中小企就未必靈。我試過攪踩單車、遊船河、打機比賽……等等，最終發覺，佢地衹係想一個字：錢！佢地其實唔想放假見到你，亦唔想陪你玩。最好係加薪加佣加花紅，唔好攪咁多嘢！」老闆C洩氣地講。

 

　　老闆D此時加入噴水行列：「嘿！我都曾經此苦，不過比你更苦。有一次我帶集團同事去外地開會，你知啦，我係游泳冠軍（雖然係三十年前嘅事），我就提佢地，酒店有個好正嘅泳池，個D唔識游水嘅我可以教佢，又叮囑記得帶泳衣，點知大陸一女同事後來以此理由，告我性騷擾，雖然我真無此意，但結果要賠錢送佢走。」

 

　　「咁你點教人游呀，有冇鹹濕成份？」老闆A問。

 

　　「冇鹹，有濕，喺水度教嘛！不過冇攬腰嗰種！」老闆C答。

 

　　「冇攬腰都領嘢？」

 

　　「佢都冇游水，嗰日我衹係教男同事。」

 

　　「咁下次教乒乓波喇。」

 

　　「教乜鬼吖！一齊出差都死，更正，想一齊出差都死！有朋友覺得女下屬能幹，常想帶佢去外國開會，點知都一身蟻呀。」

 

　　「佢做咗乜嘢呀？」

 

　　「乜都冇。女下屬根本冇同佢出過差，不過就向高層投訴，結果朋友水洗都唔清，最終要辭職。」

 

　　呢個世界，你以為打成一片，好容易被打殘一片！

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

第九屆「傳媒轉型大獎」請投etnet經濟通一票！► 立即行動