洋妞學中文追港男 估唔到這個字性感又抵死！

 

 

　　金髮美女為追香港俊男，竟然去學中文，順便學吓D中國傳統價值。

 

　　第一課講孝道。

 

　　「而家教你一首詩：『燕燕爾勿悲，爾當反自思，思爾為雛日，高飛背母時。』呢首詩係以乳燕有毛有翼就撇咗父母作反面教材。」老師一面解釋詩句，一面宏揚孝道。

 

　　「乳燕係乜？」她問。

 

　　「燕係燕子，乳係小嘅意思，例如乳豬、乳鴿。喺香港去飲，例牌有乳豬拼盤行頭，又你地外國人最鍾意食生菜包乳鴿鬆呢。好咧，你試吓用乳字做句啦。」

 

 

 

　　「而家樓價太貴，所以我住嘅地方得個二百呎乳房。」

 

　　老師想笑，又唔敢。

 

　　「唔係好掂，再造一次啦。」老師說。

 

　　「我對腳唔夠長，連四呎嘅乳溝都跳唔過。」

 

　　「咁都得？再來一次。」

 

　　「老師呀！我真係諗唔到噃，我嘅乳頭就快爆炸咧。不如咁啦，呢個字咁難，我搵男朋友操吓先？」

 

　　「咁操法，做愛多過做句啦。」老師細聲自言自語。

 

　　「老師呀！我好想嫁香港男仔，你教我wife同husband中文有幾多講法好唔好？」

 

　　「wife呢個字，喺中文有好多叫法。普遍叫太太、妻子，俗稱老婆，尊稱夫人。大陸叫愛人，老時叫老伴。古時叫娘子、髮妻。謙稱糟糠、山妻、賤內、拙荆。又有以功能嚟界別嘅，如內子、主婦、賢內助、女主人。高級功能標簽有：領導、女當家、財政部長。不過，時間長咗，統稱黃面婆。」

 

　　「嘩！中國文化真係好犀利，原來做老婆要飾演咁多角色，咁老公係咪就咁叫米飯班主呀？」

 

　　「哈！你真有慧根。從前叫當家的、掌櫃的。但係自從女權高漲、財政獨立之後，丈夫一詞，多咗一D批判性嘅同義詞，例如傻仔、死佬、潑皮、不正經的、沒出息的……等等。」

 

　　「我覺得中國男人幾好吖。」

 

　　「有D仲差，叫死鬼、挨千刀的、臭不要臉的。」

 

　　「咁長？」

 

　　「有短嘅，叫豬，或者祇係『唉！』一聲歎息。」

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

《說說心理話》心理急救II：幾個徵兆辨認身邊人需要心理支援！點樣對情緒進行急救、自我照顧？專家分享穩定情緒小練習► 即睇