點解咁凍？點樣養生？

　　上周溫度破十，有個應景笑話。

 

　　話說天宮第一夫人巡視宮廷，撞到大內總管同佢老伴。

 

　　夫人：總管，啱咧，我想問你，點解天帝近來有D異樣？對天馬鬥快、勇士鬥力、天仙鬥法都完全冇興趣？而且精神不振、成日想瞓。

 

　　總管支吾以對，老伴在旁已急不及待插咀。

 

　　老伴：回夫人，其實唔祇天帝係咁，天宮男成員都唔夠瞓，佢地趁天眷休息時，就組團下凡。

 

　　夫人：係？乜團？

 

　　老伴：昅女團囉！佢地每夜策劃路線圖，遍遊人間繁盛城市、時尚都會，專門睇靚女。

 

　　夫人：有乜咁好睇？千萬年來人間都有絕色㗎啦，但同天上嘅冇得比喎。

 

　　老伴：夫人有所不知，天上仙女包到實，人間就著得好核凸。唉！凡間D索女唔係短裙就係熱褲、或者低胸高叉、厘士see through，我地冇眼睇，男成員就爭住睇！

 

　　夫人：豈有此理！傳旨下去：人間全面降溫七日，凍死D小鮮奶，等佢地變鮮奶雪條！

 

　　回到現實，在寒冷節日期間，要注意幾點：

 

　　一．坐車時要小心被冷氣直接吹頭，巴士經常兜頭吹，所以要調較一下頭上風口。坐的士宜坐司機後面位置，冷氣冇吹得咁應。

 

　　二．今年仍有人著吊腳褲，其實足踝附近，為子宮反射區，嗰度冷，會令子宮凍，容易引起婦科病，有中醫話可能生朱古力瘤。

 

　　三．聖誕新年期間，多燒烤火鍋聚會，可以考慮一種既清熱又補氣嘅食品，就係杞子花旗蔘燉蛋。

 

　　花旗蔘要買靚D嘅，至少三百蚊一両啦，一両可以食好耐，要揀有商譽嘅藥店買，叫佢切埋薄片。

 

 

原料：杞子，長食用九粒，間中食可用二十粒。

　　　花旗蔘四至六片

　　　蛋一隻

 

　　做法：杞子花旗蔘放碗中，加少少水，落蛋，唔駛打散蛋黃，隔水蒸約十至十五分鐘，全部一齊食,食時加一茶匙蜜糖好好味。

 

 

　　祝大家有個雖然寒冷，但甜蜜嘅假期。

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【etnet 30周年】多重慶祝活動一浪接一浪，好禮連環賞！ ► 即睇詳情