【不離婚是罪】天生一副離異相，竟然有小三小四？

　　眼前這位中年型男，眼有桃花，下巴有坑（見註），明顯極具離異潛質，「捱」到現在，都算意外。

 

　　他頽然坐在沙發上，神情「幽怨」，成個憂鬱中生咁款。

 

　　「因為要離婚？」我問。

 

　　「唔係。係個女出問題，佢啱啱離家出走！你都知，我同太太感情唔好。但我好錫個女，為咗佢，我哋勉強喺埋一齊。十幾年咧！而家個女大學畢業，太太決定離婚。點知個女竟然嬲咗我，執嘢走人，我好hurt。」

 

 

　　他這片陰雲剛走，他女兒這團火便來了。

 

　　她劈頭就說：

 

　　「我要鬧爆老豆！」

 

　　「怪佢離婚？」我問。

 

　　「NO！NO！NO！離婚完全冇問題，離婚係一個大解脫，係個timing太差劣。」

 

　　她爆完粗，繼續鬧：

 

　　「佢早D離嘅話，可以放我媽一條生路，等佢重出江湖，而家殘曬。完全冇再循環價值。早D離婚，唔駛我日日見到佢地嗌交、唔駛媽咪日日眼淚洗面。早Ｄ離婚，我可以喺相對安靜嘅環境長大，你話單親家庭慘，定係打仗家庭慘？」

 

　　佢意猶未盡，仍然澎湃：

 

　　「我問老豆：你話你捱左十幾年，為咗我！但你有冇問過我先？有冇考慮過我真正嘅感受？所以我嬲死佢──嬲佢離得太遲！」

 

　　唉！佢有所不知。現在嘅timing，都唔係佢老豆想嘅。係佢媽咪做大婆做得好攰，堅決辭演，打亂咗老豆嘅如意算盤。

 

　　呢位風流老豆，喺外面已有阿二、阿三、阿四。全人類buy佢嘅憂鬱中生形象，都相信佢老婆冷漠、佢失落，於是呢D女人飛撲過嚟，而佢又名正言順用老婆做擋箭牌，唔駛娶任何一個。現在大婆劈炮唔撈，唔怪得佢咁「幽怨」，因為真係三失咧──失婚、失女、失藉口！

 

　　註：即下巴有個凹位，好似米高德格拉斯嗰款，係相學上嘅明顯離婚特徵。但曾與人同居或有過三個月持續性關係亦算數。

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

第九屆「傳媒轉型大獎」請投etnet經濟通一票！► 立即行動