第一桶金 究竟即係幾多錢？

　　「要擁有人生嘅第一桶金」，呢句說話都係當年好多人嘅座右銘，創業者也好，打工仔也好，都會以「一桶金」定為仕途上一個重要嘅Milestone，係邁向成功嘅第一步。但講咗咁多年，其實冇人定義過「一桶金」究竟即係幾多錢。當然，每個人自己個「桶」嘅標準都有大有細，有人用「木桶」，有人用「牙籤筒」，但肯定地最好多人會將「一桶金」定義為「100萬」。

 

 

　　係90年代，要賺到一桶金其實好難，多數只有工廠老細同股票大亨先可以做到，但時至今日，你可能會話有一桶金更加係遙不可及。對比返約20年前（1996年）、10年前（2006年）、上年（2016年），香港人平均每月收入為$9,600、$10,000、$16,200。而2016年香港打工仔每月收入分佈大約：

 

　　少於$9,999：17.3%

　　$10,000-$19,999：42%

　　$20,000-$29,999：17.6%

　　$30,000-$39,999：8.9%

　　$40,000-$49,999：4.6%

　　$50,000以上：9.6%

 

　　對比1996年，2016年打工仔平均收入升幅為68.8%。即係話如果以升幅比例計，當年（1996年）嘅一桶金（100萬）已經變成今日嘅168萬，一個普通嘅打工仔要唔食唔住唔洗錢8、9年多，先可以儲到今日嘅第一桶金。

 

　　好似好遙遠咁，從另一個角度睇，香港其實都有好多打工皇帝。早年有調查指出，以當年香港732萬人口計，如果唔計物業資產，只計流動資產的話，大約有76.8萬個百萬富翁，大約每10個香港人就有一個百萬富翁，真係好似便利店咁，總有一個喺你左近。同時間，大約有3000、4000人佢哋平均每年交嘅稅款係以過百萬計。當我哋8、9年唔食唔住唔洗錢去儲一桶金嘅時候，佢哋一野就用咗一桶金去交稅，聽到都心酸。

 

　　下一句你可能會問「咁點先可以做到百萬富翁呢～」，有外國專家用咗五年調查，研究咗一班有錢人，發現大部份有錢人都係有正職，都係一名打工仔，然後出面再有一間自己嘅公司做生意，生意項目主要係炒賣資產、分銷賣買等，呢班人平均年薪都過百萬，用正職嘅金錢去投資自己秘撈嘅生意，防守性極強，比他人較容易擁有一桶金。

 

　　好多人會以「要賺到人生嘅第一桶金」嘅理由，係冇乜準備之下，貿貿然辭職走去創業，亦唔好用呢個藉口而去逃避打工。有陣時最穏陣嘅方法，可能先係最容易賺到第一、第二、第N桶金嘅皇道！

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【etnet 30周年】多重慶祝活動一浪接一浪，好禮連環賞！ ► 即睇詳情