【人人變專家】新一代iPhone勢令AR大行其道

　　新一代蘋果產品喺上個星期發佈，焦點除咗係智能電話嘅售價貴到可能要賣腎先可以負擔之外，作為marketer嘅另一焦點，就係新一代iPhone嘅設計將非常適合同鼓勵AR (Augmented Reality 擴增實境) 嘅創作。

 

 

　　AR其實唔係新技術，但要數到將3D電腦圖像融合現實場景，仲要非常普及地喺手機上呈現嘅作品，相信都要數上年嘅大熱遊戲《Pokémon Go》。由於iPhone 8、iPhone X嘅攝影鏡頭同處理器都有大幅提升，相信隨著呢兩款電話嘅出現同普及，AR除咗應用喺遊戲之外，亦會漸漸喺其他地方出現。

 

　　宜家傢俬係其中一個最先使用AR技術做campaign嘅公司。佢哋早喺2014年已經將印刷版catalogue融入AR技術，鼓勵用家利用智能手機做互動。隨著AR技術發展更成熟，宜家將會喺今個月底推出全新嘅AR app，名為《IKEA Place》。配合iOS 11，用家除咗可以透過手機屏幕即時睇到傢私擺放喺自己屋企嘅效果外，AR技術亦可以根據相片掃描結果，預測傢俬擺放喺你屋企之後嘅大細，減少因爲尺寸唔啱而要退貨嘅煩惱 (準確度聲稱有98%)。

 

　　當然，宜家亦會喺app內準備好「一條龍」服務，方便用家玩完AR之後，可以隨即預訂傢俬、畀錢、安排運送及安裝。

 

 

　　上星期喺蘋果發佈會展示AR技術嘅其中一個例子就係美國職業棒球大聯盟 (MLB) 嘅《At Bat》app。佢係一個live stream棒球比賽嘅平台，而即將加入嘅AR技術，可以畀棒球場嘅現場觀眾透過手機屏幕觀察球員嘅各種數據。呢啲之前只可以喺電視機上先可以睇到嘅資訊，而家只要觀眾用手機對準佢想了解嘅球員，就可以即時睇到。

 

 

　　有公司做過統計，數碼宣傳流量嘅來源有37%係來自蘋果手機。隨著iOS 11同專門畀程式開發人員用嘅Apple ARKit喺今個星期推出，預計將會有更多應用AR技術嘅campaign推出。

 

 

　　而家幾乎每人手上都有一部高質素相機 (即手上嘅智能電話)，畀大家隨時隨地影出高質素相片同影片。一眾marketer點樣驅使用家製造更多有趣內容 (User Generated Content) 同品牌互動，將會成為有趣課題。

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

樂本健【雙11感謝祭】雙重優惠、多買多賞► 了解詳情