【做marketing甚艱難】印刷出錯？唯有捱夜黐貼紙……

　　近日收到一封信，活動日期用一張貼紙覆蓋。做marketing嘅我就係八卦同手多，非常好奇到底封信原本印咗啲咩，要黐貼紙補鑊。在燈光下一睇，原來印錯年份做2017。

 

　　我相信每一間公司、每一個marketer決定要用貼紙遮蓋印刷嘅錯處，背後都應該有一個「可歌可泣」嘅故事。

 

　　今次呢封信背後嘅故事，可能會係咁。

 

 

　　「PK啦今次，印好晒啲信先發現個年份印咗2017，今次print run仲要有10k……」

 

　　Marketer A做抽樣檢查時發現錯處，心中不知如何是好。雖然安坐辦公室，但發現錯處嗰一刻，離心力有如從十樓跌咗落街。

 

　　「如果唔話畀老細知，唔知過唔過到骨呢？唔得唔得，2017錯得太明顯……如果即刻叫printer重印過得唔得呢？唔得唔得，用多咗錢，老細最尾都係會發現……況且，呢封信下星期就要寄畀客……」

 

　　Marketer A心裏不斷盤算，手心同背脊不斷冒汗。

 

　　「唉，遲死不如早死，點都係要話畀老細知。不過等我諗定個原因解釋先……」

 

　　Marketer A喺自己位考慮咗兩個半鐘，終於鼓起勇氣，敲門行入老細房。

 

　　「老細，下星期出街嗰封信印錯咗年份。其實我哋幾個同事喺印之前都有睇過，但我諗可能或者應該係因為proofread嗰時係上個月，仲係2017，所以我哋全部都睇漏咗……」Marketer A一輪咀係咁講。

 

　　「咁而家點算？」老細冷靜回應一句。

 

　　「叫printer印過晒應該趕唔切……一係印張貼紙，遮住個2017，不過時間都有啲抆水……」Marketer A自言自語咁講。

 

　　「抆都要做㗎啦。必要時你同幾個同事一齊去幫手黐貼紙。」老細回應。

 

　　就係咁，兩個深夜，四個marketers就去咗工場度幫手黐貼紙。

 

　　以後，每當你見到一張flyer、一份brochure或者一封信，貼有一張半張貼紙，覆蓋錯處時，請記得默默為嗰位marketer祈禱，因為每一張貼紙，揭開都應該有一個故事，撕開更可能係有血有汗。

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

想要獨家投資理財Tips？即Like etnet 全新Facebook專頁► 立即讚好