【職場強迫症】殘酷的馴化！你還是那個追求完美的人嗎？

　　咩叫完美？

 

　　每個人嘅標準都唔一樣，有人覺得同一份文件，字體大小無必要統一，可以率性而行。又有人覺得投影片內嘅文字同圖像無必要對齊，只要睇得到就可以。

 

　　但職場上往往有好多「強迫症患者」（尤其是做marketing），就算廣告稿上logo位置只差1、2mm，都可以同設計師拗過你死我活。喺呢啲「完美主義者」心目中，要佢哋接受呢1、2mm嘅差別，難過登天。要不是老細一聲令下、唔夠budget或者唔夠時間重做，呢類人都唔會輕易屈服，因為「強迫症」患者一旦發現「不合標準」嘅事情，內心就會痕癢無比。

 

　　然而，有啲「強迫症患者」工作耐咗，就會慢慢接受呢個職場（同呢個世界）並唔係完美，至少並唔係完全依照佢哋嘅想法去運行。而好多時呢啲不合心意嘅事情都唔可以完全控制喺自己手中，有時可能係因為上司唔容許、同事唔配合，或因為自己體力／能力不足。從前，佢哋可能會因為一件公事而唔開心好耐，甚至影響私人生活，但當佢哋經歷過種種不如意事，佢哋喺職場嘅「無力感」就會增加。慢慢，佢哋就學懂與「不完美」共處。又慢慢，佢哋會開始對好多事情妥協，由最初「有要求」，到「不強求」，再到而家「無要求」。

 

 

　　以前，佢哋會用盡全力，嘗試改變別人嘅固有想法，嘗試改善唔work嘅process，去實踐佢哋認為啱嘅理想。過程中，佢哋往往要面對一啲「老屎忽」嘅阻撓，叫佢哋「唔好搞咁多嘢，照舊咁做咪好囉」，令佢哋有時覺得鬱鬱不得志。

 

　　但時移世易，而家當佢哋見到有人提出改變時，佢哋第一時間唔係去了解別人嘅建議、估計建議嘅成效，而係皺一皺眉頭，心諗「佢咁suggest我要做多幾多嘢呢」，然後反建議「個idea其實幾好，但今年budget可能有啲tight，不如跟返上年咁做住先？」

 

　　喺其他同事心目中，佢哋已經變成一個「老屎忽」，一個佢哋以前都好憎嘅「老屎忽」。

 

　　由追求完美，到只求盡快「埋尾」，係一個殘酷嘅馴化過程。通過無數挫敗、成功、僥倖、學習、模仿等而得出今時今日嘅工作態度同價值觀。而呢個過程可怕之處，就係佢會無聲無息，不知不覺地將你改變。

 

　　望望鏡中嘅自己，你仲係一個力臻完美嘅人嗎？

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

第九屆「傳媒轉型大獎」請投etnet經濟通一票！► 立即行動