【上海收入排行Top4】乞丐、小販、黃牛黨上榜！月入7萬仲好搵過打工仔

　　如果唔計公司CEO或者老細級人士，喺香港最高收入嘅打工仔，大多數都係專業人士如醫生、律師、高級工程人員等等，但同樣係大城市嘅上海，高收人士嘅並唔一定係讀得書多嘅專業人士，好多冇讀過書嘅打工仔，搵錢可能更多。早前喺網絡流傳一篇有關上海不同階層嘅平均收入情況嘅文章，指出13個不同嘅工種，人工由5千以下到10萬以上，當中有4個工種令你重新定義中國職業嘅搵錢能力。

　　先唔計其他非法嘅職業，排首位必定係公司老闆或者股東，平均月薪有10萬。當然只係平均數，因為好多國內老闆嘅收入，相信係以天文數只嚟形容。而最令人意想不到反而係第二位到第五位嘅一群，佢哋並唔係乜嘢技術專才，反而係一啲極唔起眼嘅職業。

　　第二位，票販，即炒賣火車飛、演唱會飛等嘅黃牛黨，月入平均有7萬蚊！當然並唔鼓勵人炒黃牛，但內地人對車飛嘅需求十分大，尤其係節日時段，回家大過天，所以從賺錢角度看，的確係一門唔錯嘅職業。

　　第三位，乞丐。上海嘅乞丐平均收入6－7萬，對比其他國家，據非正式統計，杜拜嘅乞丐應該全球收入最高，有報道指杜拜乞丐一個月最高收入有50多萬港元，當然呢個係個別例子。而喺香港，旺區嘅乞丐收入大約「時薪」$100左右，即月入約2－3萬，「旺季」時期最高有4－5萬，但都不及上海平均數。

　　第四位，熟食小販，平均收入5萬左右，係有點誇張。以一串牛肉平均賺$5計，假如一星期開店48小時，大約每分鐘賣出一串，就可以有5萬收入。除咗賣熟食，其實國內大部分小販嘅生意都唔差，尤其喺學校區或商業區附近賣熟食、日用品、服裝等等，每日平均最少都可以有幾百蚊收入，月入最少都可以過萬。行內有句述語「三分貨、七分賣」，三分靠貨品，三分靠口才，如果你口才了得，相信月入5萬非難事。

　　第五位，拾荒者。國內拾荒者嘅問題嚴重，不同地區有不同幫派，經常因為「地盤」問題而打交，係因為拾荒者嘅收入平均都有5萬蚊。其實中國嘅垃圾中，大約30%嘅垃圾都係可以回收，而且國內暫時欠缺垃圾分類嘅教育，加上地大，所以垃圾比例上亦較多。但隨著城市嘅發展，一線城市嘅拾荒者數量亦會慢慢地減少，開始步入「式微」。

　　睇完以上資料，可能你會萌生返上海打工嘅念頭，只要能夠善用時間，身兼多職，好快就可以買樓。但老土啲講句，職業無分貴賤，只要唔係犯法嘅事情，而工作亦配合自己嘅需要又搵到錢，呢個就係好職業。

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【你點睇？】皇馬巴塞傳奇表演賽爆簽名會風波，26人買涉$20萬套票僅見部份球星15分鐘，你認為事件哪方須負較大責任？► 立即投票