【職場心理學】拒絕情緒勒索：你沒有責任滿足腦細！

　　當腦細想你跟多單project並要求你額外加班，而你面露難色嘅時候……

 

　　「我睇好你先將份project交畀你做，你唔想做唔緊要呀，仲有大把人爭住做呀。」

 

　　當你仲有幾日就last day，但公司仲未請到新人嘅時候……

 

　　「你可唔可以等到我哋請到新人先走呀？你唔可以就咁擺低份project走咗去，無人跟啊！」

 

　　如果你聽到腦細咁樣同你講，你會有咩感覺同反應？係覺得被器重，定係覺得好冤屈、好無奈，甚至會怕拒絕佢而產生罪疚感？如果係後者嘅話，小編要提提你，情緒勒索可能已悄然發生！

 

 

　　情緒勒索（Emotional Blackmail）係心理學家蘇珊‧佛沃（Susan Forward）提出嘅概念，指情緒勒索者可能喺有意無意中，使用要求、抵抗、壓力、威脅、順從、舊事重演等手段，令被勒索者產生各種負面情緒，包括挫折感、罪惡感、恐懼感等。而為咗減少呢啲唔舒服嘅感覺，被勒索者可能會因為咁而服從對方嘅要求。長期下來，就會形成惡性循環，讓勒索者經常用呢種手段控制人。最終，被勒索者嘅「自我」就會喺過程中消耗淨盡。

 

　　所以，如果你發現自己已經深受「情緒勒索」之苦，必須記得……

 

1. 被人責怪嘅時候，要尊重自己嘅感覺

 

　　雖然子華神曾經講過「你份糧包埋受氣」呢句經典金句，但係當腦細／客戶用唔理性嘅說話嚟鬧你，甚至對你有唔合理嘅工作要求後，千祈千祈唔好勉強壓低晒自己嘅情緒、扮到唔在意咁。因為「被忽略嘅情緒」係唔會消失，反而可能會另找出口，例如帶返屋企發洩落父母、配偶，或者仔女身上。

 

（《棟篤神探》劇照）

 

2. 設下心理「界限」

 

　　做錯咗事，唔代表要無條件接受所有嘅指責，尤其當說話內容已偏離事件本身，而變成人身攻擊。例如，你send錯咗份報價單畀客，然後腦細話你：「我已經講過好多次，send報價單出去之前，一定要小心check清楚金額先好send。點解你又唔記得，唉，點解我會請咗個『人頭豬』返黎……」你只需要接收到「小心check清楚金額先好send」嘅信息就可以，至於「人頭豬腦」完全可以唔駛理！另外，你亦要學習點樣停止對話，阻止對方繼續用言詞攻擊自己，可以試下咁講：「我聽到你嘅建議，多謝指導」、「呢件事我冇辦法即刻答到你，畀我少少時間諗一諗先再同你講」……

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

《說說心理話》心理急救II：幾個徵兆辨認身邊人需要心理支援！點樣對情緒進行急救、自我照顧？專家分享穩定情緒小練習► 即睇