N年之前，老友劉智傑（匯豐銀行第一任華人大班）退休，晚飯時，發覺佢手腕並沒戴錶，於是問：「劉大師，做乜唔用手錶？」

　

石鏡泉與劉智傑（前左）

　

　　「阿碌，戴錶，就只因生活要受時間束縛，準時做這做那。打匯豐工時，責任在身，當然要！但退休了，我就回歸一種「無時間感」，意即，不由時間指揮做乜，而是只聽天然呼喚去過生活，如此，才可達到與大自然結合，人就會鬆弛、快樂、健康呀！任何動物，生下來皆順天而活，不會戴錶的呀！」

　

　　甚麼是順自然而活？就是要瞓就瞓，要醒就醒，要食就食，要屙就屙，依循生理呼喚而做。

　

　　今天想起劉大師，因為希望與大家分享，人的最高境界，除了順自然而活外，更重要，不被一個數字束縛—年齡。劉大師退休後不再戴錶記掛時間，我呢，認為同時應做的，是進入無齡心態，不再因年齡而活。

　

　　大部分人都很著緊自己幾歲，於是，普遍形成一種莫須有的心態—幾歲就應該做乜。這樣，由童年開始，就活在年齡枷鎖中。譬如幾多歲應該完成小學、中學、大學，讀碩士博士。幾多歲應該拍拖結婚生仔，幾多歲應該買車買樓月入多少，幾多歲應該在社會梯階爬到甚麼位置……，人是否為年齡而活？快樂嗎？

　

　　若閣下被年齡「指定」生活形態，例如，幾多歲就應該著乜、諗乜、講乜、做乜、揸乜（車）、食乜、飲乜，還有甚麼自由、甚麼人生樂趣？做唔到咪好無癮？

　

　　六十歲就開始要穿成阿叔阿嬸模樣？誰說的？任何人，一旦進入乜乜年紀就要乜乜狀態，很易變成暮氣沉沉，或慌失失，對新事物毫無興趣，甚至未老先衰，「衣垮身懈」接踵而來，古稀垂暮感覺自己一手製造。

　

　　我呢，愈來愈覺得「無齡感」好正，心中無齡，自然變咗大解放，繼而衣著無齡、飲食無齡、玩樂無齡、旅遊無齡、嗜好無齡……，最後，心理改變生理，可能最終連面貌也日漸無齡！這種無拘無束感受，不是大家夢昧以求，一生想追尋的嗎？

　

　　就由自己切實執行好了，因為，要做快樂無齡人，百分百不能靠人。不過，物以類聚，若能有個同聲同氣群組，齊齊加強無齡感。

　

慈善同學會到順德「豬肉婆」歎美食。

傳媒老友賀陳早標榮休

與「歡樂今宵之母」吳慧萍（雙手舉起姆指的銀髪女士）快樂重聚

胡楓

楊振耀、區瑞強

　

附註：想加入「慈善同學會」，做個「快樂無齡族」？電郵給我介紹自己可也，地址：luketsang108@gmail.com

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【etnet 30周年】多重慶祝活動一浪接一浪，好禮連環賞！ ► 即睇詳情