腫瘤驚魂（下）

　　腫瘤驚魂今次來到第三篇，亦是終結篇。過去十幾日，我就似進入一個「腫瘤牌局」，每一個階段揭出一隻牌。未去到最後一隻，也不知輸贏。第一隻牌揭的，是「驗血牌」，贏了。第二隻揭的，是「耳鼻喉牌」，又贏了。來到第三隻，是揸著李家仁的醫生紙，找甲狀腺專家何旭熙醫生排期。基於佢「太好生意」，要輪幾日。指定時間上到診所，護士話：「曾先生，大概要等兩至3小時。建議你到樓下餐廳坐下，就快到才call你啦。」縱目一望，小小診所坐滿人，門外亦企咗幾位，肯定等得耐過公立醫院。

 

我過去三周的經歷，就似玩一個神秘牌局，每張牌未揭前皆充滿變數。

　

　　按護士提議，到餐廳坐咗近兩小時，再在街閒蕩，果然要近三小時！

　

　　見到何醫生，態度專業而和藹，用眼用手已大致可斷症。先作安慰：「應該是良性的，但為穩陣起見，先做一次超聲波！」

　

　　做完，指指瑩幕：「曾先生，你自己睇睇，唔見有特別異象，應該是良性。但還是找另一位專家double check好一點。你揸呢張紙，約黎炳民醫生再做多次，佢係放射治療專家 ！」

　

　　意即，揭開第三隻「超聲波牌」，也是贏了。

　

　　再約見黎醫生，呢次做得更詳盡。我問：「通常點解會無情情生出個瘤呢？」

　

　　「應該忍得老婆多啩？」佢幽默回應：「講笑啫，冇乜肯定原因。你個瘤睇唔到異象，應是良性。係嘞，我想買十本你親筆簽名《優雅退休》得嗎（咁搞笑？當然得啦！ ） ？」

 

替我 Double Check 的放射權威黎炳民醫生，也是位主攻分享「幸福人生」的作家。大作上周出版。

　

　　第四隻「超聲波牌」，又win。

　

　　兜兜轉轉，又再約見何旭熙醫生，也是等呀等。終輪到：「睇片冇問題。但為防百分之二三機會，建議抽組織再化驗！你瞓低，唔會好痛！」

 

今時今日抽體內組織很安全，因在先進科技透視下進行。

　

　　就如此，一針篤入腫瘤，抽出五CC瘀黑液體，都幾恐怖。

 

抽出的組織，通常有如一筒瘀血。

　

　　「我會送去聖德肋撒醫院病理化驗所再check，四日後有結果，看看能否排除所有警報！」

　

　　嘩嘩嘩，呢四日就真係長咯！

 

香港有最先進的病理化驗所，可作出精準分析給醫生斷症。

　

　　這個「腫瘤牌局」，終來到揭最後一隻牌了，有癌冇癌，就此決定！

　

　　終於，開呀！

　

　　「曾先生，報告返咗嚟。結論係——冇甲狀腺結節，細針抽出物，良性膠樣囊腫。恭喜你，可以放心了。11月再來覆診啦！」

 

我的腫瘤組織檢測分析，良性。

　

　　第五隻「抽組織牌」都贏埋。呢場仗，暫且打完，Thank God！

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【你點睇？】美國總統大選在即，你認為誰將最終當選？► 立即投票