《Make Money》「疫」市創業系列：頂手開鋪賣和牛丼，想四個月回本憑咩嘢？

　　疫情下創業可謂「逆風而行」，不過打「疫」境波好處就係，投資成本相對上較低、而且好多人心態上都唔怕輸，今次「疫」市創業系列，又係遇到幾個後生仔，近期係荃灣一條橫街窄巷搞日式便當外賣，竟然畀佢地殺出條血路，以「蔗渣價錢食到和牛嘅味道」！係真唔係啊？

 

Brain（圖左）同Lucas（圖右）仲有一位朋友合資１５萬銀開便當店。（李皆穎攝）

 

三股東每人夾5萬，為咗幫失業「同路人」

 

　　位於荃灣鱟地坊嘅【丼駅】，係由後生仔Lucas、Brain同Billy三個人每人夾5萬創業，其中一位股東Lucas本身都係從事飲食業，但眼見疫情持續，身邊好多同行嘅朋友都失業，聽到都真係心都酸埋。不過，疫情同樣都改變好多人嘅消費習慣，包括用多咗外賣App，所以佢地幾個就萌生創業念頭，而且唔做堂食，只做外賣，真係人唔做我做，殺出條血路！

 

　　但係佢地心底裡，最希望都係想幫到身邊嘅失業「同路人」，因為有好多身邊朋友都係成年無嘢做，Brain就話，希望利用自己僅餘嘅能力，幫助身邊嘅人。雖然有時候班員工係激氣小小（例如成日遲到咁），不過睇到佢地之後慢慢有改善，好似一齊共同成長咁，所以呢間鋪仔除咗係「奮鬥房」之外，仲係「六樓後座」，一大班後生仔闖一番事業！

 

免租期有一個月咁筍？外賣Apps好緊要！

 

支援外賣平台嘅標籤貼喺收銀櫃當眼位置。（李皆穎攝）

 

　　點解咁多人係疫情下創業，皆因鋪租平而且多優惠，Brain就透露，佢哋間鋪小小百幾尺多啲，月租都只係兩萬左右，加上頂手店內上手嘅廚具爐頭，成本已經大大減低，更有趣嘅係，過往慣例免租期由14日變成個月，嘩！咁筍？即係鋪主白白送兩萬蚊畀你開鋪！另外，Lucas本身都熟悉三行裝修，所以呢個和風門面裝修都係由佢搞掂，變相連裝修費都唔使畀！

 

　　做得外賣生意，又點少得外賣Apps呢？而家外賣Apps改變行內飲食生態，Brain就話目前外賣App佔整體生意量三至四成，其餘都係Walk In落單為主。另外，佢哋都認為目前呢個時勢艱難，所以飲食業之間應該守望相助，達至「共贏」狀態，所以開鋪之後，就同前後幾間飲食鋪成立「聯盟」，只要憑對方票尾再消費，就可以拎到九折，從而帶旺成條街，所謂「要贏一齊贏」！

 

試和牛試到嘔，希望食客試到高品質丼飯

 

除左丼飯之外，鋪頭仲有賣各種日式炸物。（李皆穎攝）

 

　　佢哋可以有一個月免租期，慳番嘅成本可以投入返喺食材上面。Brain就話，佢哋其中一個「和牛丼飯」，當初為搵出高品質和牛，試貨都試咗萬幾蚊，日日煎和牛食到成口油，真係聽到都覺得漏！再加上店內所有汁醬都係自己調配而成，就係希望食客品嘗到高品質丼飯。記者做採訪時候都有試過佢哋出品，如果加個麵豉湯，同市區賣120蚊一個丼飯堂食差唔多水平，咁樣做生意真係有錢賺咩？

 

　　同佢哋計過盤數，目前佢哋鋪租兩萬，人工兩萬，水電煤加食材一萬多少少，如果開足30日，每日賣出40個飯就可以打和，所以Lucas就話，由於佢哋鋪面、租金節省出嚟，可以投入返食材，所以平均每個丼飯定價都係40幾蚊左右，仍然有利可圖，Lucas更有信心話：「相信四個月就可以回本！」係真唔係啊？

 

希望短期擴展一至兩間，員工都有分紅！

 

　　做好盤生意就梗係艱難，但做個好老闆就難上加難！Brain就表示，短期內展望可以再擴展多一到兩間鋪，令生意慢慢擴充，同時希望都想幫到更多失業年輕人，等大家齊齊有飯開，度過呢個疫市困境；而且呢間鋪頂手費唔貴，變相令佢哋有更多流動資金，可以做好個品質。

 

　　生意就做好啦，咁好老闆又應該如何是好？Brain就話，員工應該分享公司成功嘅果實，所以只要當外賣生意每個月達到某一個數，員工係會有分紅，而且為獎勵員工嘅勤力，Brain曾經獎勵過員工一部iPad！雖然係小小心意，但可以睇得出佢幾用心對待員工！唔知佢哋仲請唔請兼職呢？

 

撰文：李皆穎

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【你點睇？】當局料聖誕新年期間逾1300萬人次出入境，較去年同期大增。你對本港聖誕新年市道是否有信心？會否出境旅遊？► 立即投票