2021-01-20

《經濟不停學》ETF入場費低散戶啱玩，管理人角色相當重要！

　　之前同大家講過咩叫逆向ETF（或稱槓桿反向ETF），即係買掛勾產品下跌，但近期間間大行都講緊炒復甦，唔識入乜個股，最好方法就係直接買指數股票型基金（ETF），通常呢類基金可以一次過買入多隻股票、債券或商品，適合用嚟分散投資風險，另外管理人喺ETF嘅角色同樣重要，因為直接影響你嘅收益！

(Shutterstock圖片)

ETF等於一口氣買齊想買嘅股

(Shutterstock圖片)

　　係ETF出現之前，投資者追蹤單個指數或某類商品，就要一籃子買齊晒，成本高昂之餘風險又大，後來有位名叫約翰·柏格嘅企業家，就想到一個方法，就係成立一個指數基金，而呢個基金專門買標普500指數旗下股份，投資者只要投資呢個基金，就等同買齊晒標普500所有股份，投資者成本及風險相對地降低，又能完全追蹤到指數所有股份。

　　發展到今日，ETF嘅產品已經多如繁星，涉及唔同指數、債券、商品，以香港為例，最出名就梗係盈富基金（02800），佢係屬於恒指ＥＴＦ嘅一種，基金會買入所有恒指成份股，而投資比例會跟返恒指公司公布嘅權重，最終基金價格及回報走勢，都會跟貼恒指；至於追蹤商品價格嘅，例如SPDR金ETF（02840），每當投資者買入呢隻ETF，基金就會買入相應價值嘅實金做儲備。

ETF有管理費，學識格價最緊要！

(Shutterstock圖片)

　　買ETF其實就唔多使用腦，梗係快捷方便啦！不過，呢種方便係有代價㗎，皆因管理人會收管理費，以香港上市嘅四隻科指ETF為例，每年管理費由0﹒25％（安碩恒生科技（03067））至1﹒05％（南方恒生科技（03033））不等，差距超過三倍，所以一定要格下價先，因為管理費而賺少咗，好唔抵家嘛。

　　有人就覺得「本多終勝」，如果我係大型投資者，咁指數入邊每隻股份都買齊咪得囉。呢個諗法理論上係啱，但隻隻買齊，涉及交易費、印花稅及佣金，計計埋埋分分鍾貴過畀ETF管理費；而且ETF嘅最大好處，就喺入場費低，好似盈富一手都唔使萬五蚊，比起一手QQ都六萬幾啦！買科技股ETF某程度上好過買一手QQ，所以有啲錢，係要畀人賺下嘅。

　　另外，管理人對ETF嘅影響唔淨止管理費咁簡單，因為唔少散戶會買嘅基金都屬於被動基金，意味管理人有權調配基金內嘅資產喺幾時同幾錢買賣，所以到最後有機會同標的走勢產生偏離，呢樣嘢叫「追蹤偏離度」。而偏離度高亦唔代表會賺少咗，只係反映同標的走勢差距有幾大。

原油「負數」嚇怕散戶，ETF管理人發揮最大作用

(Shutterstock圖片)

　　大家仲記唔記得上年四月油價大瀉，期油更跌到負數呢件事呢？當時F三星原油期（03175）管理人為減輕風險，就宣布將持有６月期油合約直接轉倉至9月，雖然原本嘅做法係要順序轉倉至7月、8月，但管理人解釋係為咗避免投資者損失全數投資。雖然呢隻ETF價格之後潛水，又錯過6月期油反彈，但顯示出管理人如何發揮「救亡」的關鍵角色

　　仲有一點，一隻ETF嘅管理人或公司出唔出名，過住表現好唔好，都有可能影響旗下產品嘅交投量，交投量高就方便投資者會容易套現。至於近期盈富管理人就投資制裁事件「彈出彈入」情況相當罕見，但事實證明買ETF都有風險存在。

　　所以大家投資真係要小心啲，認清唔同產品嘅特性，只要搵啱好嘅ETF產品及管理人，就可以食盡大市升浪，又唔使多費腦力啦！

撰文：吳藹林