《經濟不停學》小學雞學堂６：靠幾粒神奇數字預測波幅，係真唔係呀？

　　以往講解陰陽燭、平均線，目的係學識睇股價趨勢，大概評估短、中、長期會升定跌。不過過往有人提出過一啲非常系統性嘅理論，係可以計埋股價、指數會大概走到咩位置，而比較主流就包括有黃金比率、波浪理論、道氏理論同江恩理論共四個分析理論，今集就講講頭兩個先啦！

 

黃金比率：由自然界領悟出嘅計算方法

 

　　黃金比率（黃金比例，golden ratio）可以喺唔少動植物嘅外觀發現，而十二世紀意大利著名數學家法布蘭斯係第一個將呢組數字用嚟預測股價嘅人。黃金比率嘅「神奇數字」係由一連串數字組成，任何相連嘅兩個數字加埋都等於之後嘅數字，例如1、1、2、3、5、8、13等，當一個數字除以之後嘅第一個數字，佢嘅結果會愈嚟愈接近0.618，而當一個數字除以之後嘅第二個數字，結果會愈嚟愈接近0.382。

 

　　喺技術分析入邊，經常會用到0﹒382、0﹒5、0﹒618呢三個數，喺上升（下降）趨勢中，當價位出現較大調整果陣，回調（反彈）嘅位置通常止於整個升幅（跌幅）嘅38﹒2%、50%或61﹒8%。

 

（資料圖片）

 

　　用最近期嘅恒指走勢為例，上年9月25號，恒指開始由低位23124﹒25點升至今年2月18號嘅31183﹒36點，升幅8059﹒11點。假設依家個市整體趨勢係下行，公式就係：

 

　　31183﹒36　－　8059﹒11　Ｘ　0﹒382＝28104﹒78點

 

　　呢個會係理論上第一個支持位。將上面公式嘅0﹒382以0﹒5同0﹒618取代，得出第二個同第三個支持位會喺27153﹒8點同26202﹒83點。當然實際上可能會有少少誤差。

 

　　而黃金比率係唔應該當單一指標嚟用，可以配合RSI、移動平均線睇，總之愈多指標去證實同一樣嘢就愈有效。

 

股市有浪睇，數清楚避免坐艇

 

　　波浪理論（Elliott Wave Principle）由美國會計師Ralph Nelson Elliott提出，佢認為世間萬物都有相同嘅規律，所以股市會好似潮水咁有跡可尋，股價嘅波動係浪接浪，周而復始咁運行，係咪好玄呢。

 

　　根據呢個理論，股價或指數喺一個周期入邊會經過推動階段同調整階段。推動階段有五浪，叫第一至第五浪；調整階段分三浪，以a、b、c浪命名。

 

 

　　以牛市為例，第一浪一般會被視為跌後嘅反彈而被忽略，係五個上升浪入面最短嘅；第二浪係下跌浪，調整幅度相當大，當呢一浪就完，成交量會少咗；跌完後第三浪嘅上升幅度同時間係最多、最長嘅，當個價突破第一浪嘅高位，會係強烈嘅買入訊號；第四浪同第二浪一樣會跌，呢浪嘅低位通常唔會低過第一浪嘅高位；第五浪係上升浪，通常升幅細過第三浪，因為之前一、二線股已經炒起、依家啲人會連三、四線股都炒埋。

 

　　五浪完晒就到調整階段，a浪出現意味中期升浪結束，下跌幅度細，可能會令人覺得上升趨勢未完。b浪係下跌浪入邊嘅反彈浪，通常成交量唔高，呢個時候入市可能要坐艇。c浪係極具殺傷力嘅跌浪，而且持續時間長，咩股都會跌。

 

　　而且浪頂浪底都係有數得計，關鍵在於黃金比率0﹒382、0﹒5、0﹒618呢三粒數。上升浪常用比率係1﹒382、1﹒5同1﹒618，一個上升浪可以係上次高位嘅1﹒618，而另一個高位再乘以1﹒618，如此類推。同樣應該配合其他指標去選擇用咩數字嚟計。

 

　　其實喺牛市，有恒心捱完個調整階段，好快就會去返第一浪，所以未必要坐好耐艇。而喺熊市c浪完咗，有機會係會繼續下跌。

 

 

撰文：吳藹林

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【你點睇？】美國總統大選在即，你認為誰將最終當選？► 立即投票