老媽子講，我細細個上契齊天大聖保平安，或者因為咁，特別鍾意運動，好少病痛，偶然唔舒服，都覺得小病是福。

　　92年，陪老竇去診所檢完查，隨口噏：「小腹痛咗幾日。」醫生吩咐瞓上床，左撳右撳，「你老竇走得，你唔走得，慢性盲腸炎，隨時變腹膜炎，即刻去做切割手術。」留院期間，撞正歐國杯外圍賽，屋企人攞咗架小型手提電視機，夜晚睇直播，日頭招呼絡繹不絕嘅親朋戚友，又有老婆餵食粥，完全唔使郁。爽，小病是福。

　　98年，足球比賽中，畀個波兜口兜面省中，雙手掩面倒地，隊友檢查傷勢，大叫：血呀。擘開雙眼，一片白濛濛，乜都睇唔到。去到醫院，醫生植入矽膠，填補視網膜裂縫，瞳孔撕裂就救唔番，從此伸縮不靈。畀老婆徹底問候完，咪又係噓寒問暖，照顧周到，乜都唔使做，半個傷殘人士，地鐵有人讓座。爽，小病是福。

　　今趟心臟病發，除咗心重傷，死咗啲無得復元嘅細胞，裝咗幾件支架，終生食藥之外，頭尾不過四日，傷口得個小窿，無劇痛，無不便，仲有成村人關心。諗起休養期內，唔使洗碗吸塵晾衫，無人再叫我跑馬拉松啦，第時見到老婆想鬧我，只要揞住心口，皺埋眉頭，大人肯定收口。超爽，小病是福。

　　乜嘢係小病？取決於積極正面樂觀心態，呢幾樣品性，我都有；明知改變唔到事實，不如接受；既然接受，不如苦中作樂，快樂總好過哀愁。

　　「老婆，小病是福，口淡淡想食橙。」

　　「好番，小你個頭，去幫我搣個橙。」

轉載自: 晴報

【etnet 30周年】多重慶祝活動一浪接一浪，好禮連環賞！ ► 即睇詳情