半生有「球」必應，足球籃球網球羽毛球乒乓球，甚至桌球，只要係球，就啱我。四年前，無緣無故，四十年足球生涯忽然停咗，睇波興趣唔見咗，或者人老咗，鬥心細咗，生命中陪我成長嘅運動，消失咗。

　　四年來，劇烈運動唔使預我，跑步游水單車悶到傻，無乜興趣喎。不知不覺，健康差咗，行樓梯索氣咗，一年重一磅嘅魔笛終於吹響咗，企上個磅，OMG，178磅，隱隱然肥佬一個，我真係接受唔到囉。

　　阿仔冷笑三聲：「呢嚿腩肉乜傢伙？」對於一個自小逃避讀書，終日流連球場，「立志」做體育教師，唔理幾忙，每星期至少打一場波，保持體能體態喎。三聲嘲笑，近乎侮辱，當頭棒喝，下定決心去健身房，跑步舉重仰臥起坐，代價大囉，腰痛手痛腳痛全身劇痛，差啲落唔到床，退化到難以想像，但既然行咗最勇敢第一步，第二三四步，應該易行好多。

　　大部分人唔明，肚滿腸肥腦細唔想明，商場競爭，鬥智之外，更加鬥力，運動係保持精力嘅最佳方法，無強健體魄，無堅強意志，點長期保持作戰水平，頂住沉重壓力。人生下半場，健康更重要，原因得一個，杜汶澤講過：「我唔怕死，只怕老來身體差，辛苦自己，又難為別人照顧。」我怕，怕瓜咗，見唔到老婆。

　　為咗老婆同我嘅幸福將來，唔會再藉口多多，希望體能盡快回復正常，搵埋商業贊助，滿足阿仔願望：「老竇一齊跑上喜馬拉雅山，五千米base camp。」父子同上同落，參加埋Amazing Race，齋諗都爽。

　　「老婆，我最近係咪大隻咗型咗？」

　　「唔覺，唔使挺胸縮肚，呢嚿腩肉是甚麼？」

　　「唔係喎，操咗三課，真係好似fit咗喎。」

轉載自: 晴報

【你點睇？】財政預算案展開公眾諮詢，學者倡問責官員減薪並削減公務員編制，你是否認同？ ► 立即投票