開波放假 政府德政

　　細細個對巴西嘅最深刻印象，唔係嘉年華，而係沙灘。巴西嘅沙灘特別之處，就係永遠有人響度踢波，男或女、大或細，都響度踢踢踢，好似乜都唔使做咁！

墨西哥fans好多全職睇波，返工？遲啲先講啦。

　　我嘅世界杯行程，要去到最後一站先至會去里約熱內盧，諗住到時先可以見識到巴西沙灘嘅威力，點不知原來福塔雷薩呢個北部城市已經滿足到我！

　　第一腳踩落去呢個白雪雪嘅沙灘，果然同想像中嘅一樣咁滑嘟嘟，而行埋去啲鬥緊波嘅朋友仔時，果然佢哋又真係會受埋我一齊玩，我位女拍檔Gloria睇睇下都決定join埋一份，最有趣係有幾個當地小朋友周不時走過嚟又痴波踢兩腳，有位小妹妹仲要每次都要搵手執起個波踢大腳踢窩利先安樂，呢個就係巴西足球王國嘅由來吧。

　　去福塔雷薩係因為追巴西隊，佢哋今晨第二場分組賽就響呢個城市對墨西哥，不過今場巴西嘅主場氣勢就無響聖保羅咁勁，唔係巴西人少咗，一樣周街都係香蕉色，而係因為墨西哥都人多勢眾。由於地理上嘅方便，好多墨西哥人一早已經進駐福塔雷薩，除咗飛機同陸路之外，仲有郵輪直達，問過啲墨西哥朋友佢地話有五、六萬人大軍壓境，我懷疑佢哋就係巴西以外嘅fans第一大黨，墨西哥晉級嘅話，佢哋話會keep住去比賽城市支持，嘩，真係唔使返工㗎咩！

　　真係唔使！今屆巴西政府嘅德政，係比賽城市響比賽當日自動放假一天。哈哈，很想要吧！所以難怪比賽前一晚，響沙灘旁邊嘅大小酒吧都坐滿晒人，因為奉政府籲放假要去玩，睇嚟要令人民們開開心心，其實唔係好難！

轉載自晴報

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【etnet 30周年】多重慶祝活動一浪接一浪，好禮連環賞！ ► 即睇詳情