意大利原來fans多

　　西班牙出局，唔少fans、包括我上屆嘅拍檔高Ling（高海寧）都傷心到暈，不過與此同時亦有唔少呢幾年受過西班牙氣嘅其他fans把握機會一齊唱「喜氣洋洋」。

 

　　球場就係如此一個英雄地，成績決定一切，遊戲規則正是如此。失落嘅朋友毋須太失落，其他fans會慢慢同你坐埋一條船，而永遠都會有下屆賽事等緊你！

 

　　西班牙輸在食老本無晒活力，但今屆確實有好多支球隊都令人眼前一亮，鬥志強勁有備而來，你睇第一round有六場波係落後球隊可以反勝就知一二！就算都係一分都無嘅澳洲，同荷蘭搏到盡雖敗不辱。西班牙呢，新人係時候接棒嘞。

 

　　今屆我暫時現場睇過三場波，包括揭幕戰巴西對克羅地亞、英格蘭對意大利、巴西對墨西哥。巴西嘅主場威力喺強，但我對作客嘅墨西哥fans印象仲深刻，佢地差唔多霸到三分一座位，軍容整齊口號一致，我認為呢班第12人將會響之後嘅比賽繼續發揮重大作用，而其他都有呢個動員能力嘅包括哥倫比亞、烏拉圭、阿根廷呢幾個隔籬鄰舍。歐洲隊喺得英格蘭好啲，但都只係有幾千忠實fans啫，未必夠嗌！

 

　　講起意大利，其實喺好有味道嘅一隊波，佢哋唔係用緊主流體系嘅快速反擊，因為無咁多年輕快馬，亦唔係打有啲out out哋嘅控球在腳TIKI TAKA，反而係用大佬派路做重心踢陣地戰，每一個攻勢都由佢發動派牌，鋪橋搭路，冷靜淡定，隊友對佢有幾信任，你睇個個前仆後繼就知。35歲嘅派路可以頂幾多場分分鐘佢自己都唔知，但係做球迷嘅，有一場就好睇一場啦！

 

好多巴西人都有意大利血統，令後者亦擁「主場優勢」。

 

　　意大利仲有一個無人留意嘅優勢，就係原來好多巴西人有意大利血統，數字僅次於葡萄牙，所以佢哋有唔少潛在fans，對英格蘭當日，支持意大利嘅聲音就竟然多過對手嘞！

 

轉載自晴報

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【etnet 30周年】多重慶祝活動一浪接一浪，好禮連環賞！ ► 即睇詳情