「第12人」化身尼馬

　　四強前夕，就如暴風雨前嘅寧靜。巴西八強贏哥倫比亞嘅上半場，係睇咗佢哋咁多場最好嘅一場，全場壓迫令對手氣都唞唔到。不過下半場鬆番些少，加上尼馬受傷，一度出現險象。

冇咗尼馬嘅巴西令球迷「O嘴」，萬一佢神奇復出，恐怕會更驚訝。

　　今屆巴西表現上落好大，幸有訓導主任「大菲」識提升士氣同注意力，不過今晚四強呢個非常時刻，不幸冇咗前後場兩位重心尼馬同堤亞高施華，「大菲」如何維持士氣將是勝負關鍵！

　　響巴西執筆時，突傳來如巴西入決賽，尼馬或打局部麻醉針神奇復出嘅煙幕，我就覺得雖聽落得啖笑，企都難仲話要落場？但係背後極可能係有人想將失去尼馬呢個負面因素，扭轉成正能量！

　　若球隊團結，抱住為兄弟搏命、博佢有機會英雄式回歸嘅態度去鬥德國嘅話，成班少爺兵戰鬥力將急升，情況似對哥倫比亞上半場，巴西脫胎換骨多少係因為之前對智利畀人狂鬧，「大菲」稍為刺激下班波嘅自尊心，拼勁就來了。

　　巴西球迷好單純，問十個有十一個話你知冇咗尼馬好慘，但邊隊會捧盃就會話：捨巴西其誰！「為尼馬拼命」呢個口號將會非常啱球迷胃口，看台上將會繼烏拉圭球迷嘅「人人係蘇七」之後，出現個個都係尼馬嘅場面，第12人將係德軍最難面對嘅「X力量」！

　　尼馬決賽再現球場？有可能嘅，不過係扶住拐杖接受球迷歡呼！我今晚將會係現場為大家評述巴德大戰，睇下會見到幾多個「尼馬」先！

轉載自晴報

《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

樂本健【年度感謝祭】維柏健及natural Factors全線2件7折► 了解詳情