唔好誤會，我冇唔開心

　　睇完世盃決賽3小時後，我已經喺機場寫緊呢篇稿，但自己依家仍然消化唔切結果，阿根廷輸波，當然要時間反思下愛隊有乜需要改善啦。

世盃之旅告一段落，最後於里約耶穌像告別。

　　今次巴西世盃之旅，可以用「Wonderful」嚟形容。初時以為巴西好危險，成日暴動，大家都好有戒心，但喺度生活一個月後，先發現所有先入為主嘅感覺都係超錯！巴西人比較熱情可愛，就算喺街唔識你都會say個hi。至於治安，有部分遊客區雖有疑似扒手，但基本都ok。巴西隊最後被人狂炒1︰7後，防暴警已ready晒，但國民都好成熟冷靜，未有出現大規模暴動。

　　我亦都好想多謝阿根廷，佢哋今屆陪住我寓工作於娛樂到最後一日，雖然實力唔係超班，美斯亦證明唔係時時都可以做超級英雄。德國入波後，好多香港觀眾以為我唔開心到唔出聲，不停「抽水」恥笑我：「Keyman乜咁嘅樣呀！唔係呀嘛？」其實大家誤會晒喇！我因為要係完場前趕落去地下拍片，所以先由其他拍檔負責講波。阿根廷雖然輸，但輸得都好happy，一嚟盡晒力，二嚟德國的確更強，優勝劣敗非常合理，非常平靜。阿根廷24年後再拎亞軍，算係咁啦！

　　有朋友仔問我，你哋班主持成日喺輸波後互窒，喂其實都係搞氣氛啫！你哋平時約朋友睇波講波，都會「互抽」啦！足球最緊要開心，唔使太多想像嘅！

　　我依家入閘上機返香港喇，希望遲啲都可以喺《晴報》再同各位讀者見面，繼續互相「抽一番」！

轉載自晴報

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【你點睇？】財政預算案展開公眾諮詢，學者倡問責官員減薪並削減公務員編制，你是否認同？ ► 立即投票