【真人真事】「一見鍾情，我愛你所以落你降頭。」另類的職場求愛方法真係Work？

　　女人堆除咗講是非之外，感性嘅女同事們都會同大家分享佢地嘅感情煩惱嘅。職場女性對「關係」呢樣野真係好有趣！有啲你見佢外表open但收兵頻頻嘅女同事，原來對心中嘅白馬王子專一至死；但有啲斯斯文文嘅鄰家小綿羊，反而心思極度細密，每一個部署都好似戰狼咁「退一躍百」。面對唔同類形嘅女同事，其實大家都唔會好似讀書時代一樣「你係姣婆！我地要排斥你！」有時輕鬆分享下大家嘅煩惱同戰略，可能仲獲益良多！最近我身邊一個同事就分享左佢嘅感情生活，恐怖，但我鍾意！

 

 

　　男主角年青有為，30歲啱啱出頭，佢開嘅創科公司已經上哂軌道。雖然大隻就唔稱得上，但1.8米高度加上英國口音已經迷倒在場唔少雌性。可惜，荀盤都是這樣，身邊已經有個拍拖多年嘅女朋友。女同事F係一個同工作有關嘅社交場合認識男主角，而佢自身條件都唔錯，身邊亦有唔少狂蜂浪蝶，但偏偏對男主角一見鍾情。敢愛敢恨嘅同事F一於少理，當日出盡方法涮存在感，成功搏到男主角眼球，二人交換卡片之餘，私下亦有見面。

 

　　大家成年人，之後嘅感情及肉體關係發展成點，就唔再作詳細交代，亦並非本文重點。重點是，男方對正印有多年感情，同時又對同事F有新鮮激情，三角關係僵持不下。同事F為左打破僵局，唯有出此下策：

 

 

　　「我去左搵降頭師落Dennis（男主角化名）降頭。」

 

　　「吓！？咁恐怖？」

 

　　「唔恐怖，再恐怖嘅事都有！我去落降頭時，個降頭師話我原來俾人落左降頭添啊。」

 

　　「你俾人落咗降頭？？？？係咪個正印呀？」

 

　　「應該係！但個降頭師話個降頭唔係針對我，應該係個正印落係Dennis身邊嘅其他女人身上。所以，個降頭師問咗我一句『你想唔想反降？』」

 

　　「嘩！淨係聽到呢啲terms都覺得恐怖！你有冇做？」

 

　　「緊係有喇，我俾咗成3萬蚊反降佢，不過要啲時間先睇到成效喎。」

 

　　「嗯，你自己小心啲呢啲嘢啊要。」

 

 

　　結果，同事F同男主角快速奉子成婚。無神論嘅我一向覺得降頭呢家嘢信則有，不信則無，但同事F嘅經歷巧合得太恐怖。有時，當成年人遇上愛情，幾雞野投資真係濕濕碎。假如勝方係你呢邊，或者你會對呢啲偏門方法心動；但假如你係敗方，你就會覺得呢啲手段好恐怖，恨不得佢撞邪瀨野。故事刺激還刺激，不過都係奉勸各位唔好玩火。

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

《說說心理話》心理急救II：幾個徵兆辨認身邊人需要心理支援！點樣對情緒進行急救、自我照顧？專家分享穩定情緒小練習► 即睇