【職場old seafood】想成為公司的老臣子？香港某高官絕對是你的學習榜樣

　　係一間公司入面，除咗老闆惡哂，最惡嘅仲有咩人？就係好食懶飛，自己唔做野但又大大聲order人做野，做完又嫌三嫌四，用「想當年」態度去教訓你嘅老屎忽們！

 

　　係一間公司入面，除咗老闆惡哂，最惡嘅仲有咩人？就係好食懶飛，自己唔做野但又大大聲order人做野，做完又嫌三嫌四，用「想當年」態度去教訓你嘅朝中老臣子－老屎忽們！老屎忽們唔做野，但又因為昔日幫公司打過江山，而新上任嘅老闆2.0又忌班海鮮同家父嘅關係唔炒佢地，令到海鮮愈嚟愈老、愈嚟愈肆無忌憚。試諗下，有糧出又唔洗做野，仲可以「也文也武」，之於嗰啲小學雞先在意嘅人際關係，重要咩？有錢落袋先係最重要！講咁多，其實我都係想講做老屎忽嘅好處，老屎忽萬歲！！不過，要做老屎忽你估咁易啊？想成為老屎忽呢啲咁專業嘅人物？我建議你向我地香港高官劉江華好好學習！

 

　　劉江華，學術背景優異，又積極於各種社交聯誼活動，加上個人努力不放棄嘅態度，成功令佢由平平無奇嘅教師成為今日嘅局長。佢嘅兩大從政態度，想成為老屎忽嘅你要留意！

 

 

江華秘笈一：安靜垃圾桶

 

　　開會千祈唔好急於表現自己，最好盡量保持低調。好多人都會想係老闆面前表現自己，勇於提出意見，畀大人物好好咁記住自己。但要小心，當你提議嘅野得到老闆同意執行，PIC一定係你；同時，人紅自然是非多，各方爭上位小生都會視你為敵人，為阻你上位係背後大放暗箭，令你負責嘅project流產甚至爆穫。好快，你嘅職場生涯就會四面楚歌。所以如果你想成為德高望重嘅老屎忽，就要同劉江華開會嘅做法一樣，粒聲都唔好出！等嗰班鷸精蚌精出去互相廝殺，你就成為羸家漁翁；而且，低調行事除左可以延長你嘅壽命，亦可以免卻被分配工作嘅機會，咁你就可以修練到老屎忽秘技：唔做野都唔會俾人炒！

 

 

江華秘笈二：政治變色龍

 

　　要做老屎忽首要條件緊係要條命長，先可以做到喇。但辦公室政治分化，各個門派各自為政，針鋒相對，一個唔留神櫈都未坐暖就全軍覆沒。所以計我話，大家應該學劉江華咁樣，趁仲GREEN時入多幾個唔同門派，等人地知你對對手有一定認識，接受你做二五仔嘅機會都大啲。你仲應該好似華哥咁，為左顯示對黨嘅忠心，推翻昔日自己表過嘅態、講過嘅話以穫取信任。簡單黎講，做牆頭草啊。咁你先可以俾機會你果條幼苗慢慢成長，成為冇人敢郁你嘅老屎忽。

 

　　其實，老屎忽呢種人真係唔係個個都勝任到。冇朋友、衰格、自大等等特徵係背後應該畀人鬧到仔都唔敢生。但如果你真係想唔做野又有糧出嘅，認真，政府高官係你好好嘅學習對象！

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

《說說心理話》心理急救II：幾個徵兆辨認身邊人需要心理支援！點樣對情緒進行急救、自我照顧？專家分享穩定情緒小練習► 即睇