中央肥胖有危險 五分鐘減肚腩神功

　　「老公，大時大節，大魚大肉，慘咧！好似肥咗添。你話我係咪中央肥胖呢？」

 

　　「唔係，係全身肥胖！」

 

　　老公捱咗一嘢粉拳之後，正經咁講：「不如你去游吓水啦，最好游蝶式，包收肚腩。」

 

　　「唓！唔好傻啦，你睇鯨魚廿四小時、年中無休咁游，都未瘦過喎！」

 

　　「老婆，你同鯨魚好似，除咗大家都中央肥胖之外，佢識噴水，你識吹水！」

 

　　以下並非吹水。根據國際中央肥胖2007年調查報告，香港約有四成人有此問題，相信現在人數應該更多。

 

 

　　「啤酒肚」或大肚腩除令女人有孕味、男人有「佬」味之外，仲有疾病高危意味，因為藏於腹腔嘅深層脂肪包住肝、腎、腸胃等主要器官，當呢D多餘脂肪愈積愈厚時，會釋放出游離嘅脂肪酸，引致三高：血糖（關乎糖尿病）、血脂、血壓均高，甚至引起心臟病。

 

　　所謂中央肥胖，有根據body mass的嚴格標準，亦有凡人都明白嘅街坊尺度，就係男性腰圍唔過35吋半（約90cm）女性唔過31吋半（約80cm），都係亞州人嘅標準。

 

　　要消滅呢D肥膏，當然要從飲食同運動入手啦，以下一個運動，首先講吓功效，引誘吓你先！

 

　　有男士做咗三個月，肚腩嘅孕味由五個月減至三個月，雖然佢要換過wardrobe，但係好鬼開心。

 

　　當然，亦有人唔得，原來佢自己偷「功」減料，由四百五十下減到變咗十五下，真係慳水慳力，懶惰無敵！

 

　　做法其實好簡單：

 

　　（一）早上或晚上卧在床上，兩手戴純棉手套（否則腰幼了、手卻粗了）。

　　（二）雙手握拳，用手指第二節這一排的平面，兩手一齊掃腹部。由膻中穴（兩乳之間）一直掃到恥骨（私處上面的骨）五十下。

　　（三）再在這路線旁掃五十下，也是由上而下。

　　（四）跟住從肋骨側開始，斜掃至恥骨。五十下。

　　（五）重複三次，共四百五十下，做（二）（三）時手踭可枕在床上，便不覺累了。掃時全程要用啲力，不過唔駛搏命。

　　（六）勤力嘅早晚做，效果特佳。hea啲就一日一次，亦可收腹。

 

　　此運動還有好多妙用：

 

　　（一）排出身體濁氣，因此有時會放屁，你有愛人喺身邊就要揀時間做咧！

　　（二）由於掃嘅範圍包括消化系統，有助排便，有時做完可以立刻去洗手間。

　　（三）範圍亦覆蓋一D婦科穴位，可以提升女士嘅健康。

 

　　此「神功」真係每天只須五分鐘，快靚正！做得夠日子功夫，鯨魚都變飛魚啦！

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【香港好去處】etnet全新頻道盛大推出！全港最齊盛事活動資訊盡在掌握！► 即睇