【職場藝術】先道歉，後鬧人！中高層人員的管理之道

　　在家面對屋企人，遇到不滿，你可能會毫無保留地鬧人；但身處辦公室，面對下屬同事，遇到不滿，你又會如何處理？

 

　　默默啞忍？可能會令下屬同事變本加厲，有恃無恐。大聲喝罵？相信絕少人會咁做，始終與下屬同事相處講求長期合作關係，大家相輔相成。他朝一日有求於人，今日留了一線，日後始終較易開口。

 

　　那如何才可以做到提醒（或警告）別人，而不太破壞雙方關係？從一位前輩身上我學到其中一種方法，就係「先道歉，後鬧人」。

 

　　無錯，就算係佢做錯在先，你都先行向佢道歉。

 

 

　　「對唔住，可能係我做briefing嘅時候講得唔清楚，先會令個project而家做錯晒方向。其實你做到一半嘅時候，有冇諗過徵詢一下我嘅意見？」

 

　　「對唔住，我諗我太take it for granted，以為全marketing team同事都知道印宣傳單張之前，睇打稿係基本程序，所以我都幾驚訝你今次無睇過就拎去印。下次我會睇得緊啲。」

 

　　以道歉作為警告別人的開頭，simply給了一個藉口去打開這個話題，而且先給聆聽者一個負責任的印象，就是令他們感覺「有錯，我會同你一齊解決」，然後才入「正題」。這種開場白於電郵尤其普遍。

 

　　但注意，這種道歉式開場有時可能會畀人一種「串」或者較挑釁的感覺（尤其於面對面交談時），所以運用時，請注意語氣及用詞。否則，弄巧反拙，可能比起你直斥其非後的情況更差。

 

　　身處辦公室，畀意見嘅方式有成千上萬種，面對不同人亦需要不同手法，以上方式供大家傍一傍身。畀意見期間或畀意見後，對方嘅負面情緒有時難以避免，但不可以因為害怕尷尬而避而不談。人在職場，面對不同上司同事下屬，懂得向他們反映意見非常重要。除了因爲希望他們作出改善，與自己磨合得更好外，亦是為了讓「在位者」知道你的延伸價值──你並不止於發揮自己，而是能夠幫助身邊同事下屬，甚至上司，發揮得更好，最後讓公司得到最大益處。

 

　　懂得讓下屬同事發光發熱，其實比獨領風騷更為厲害。這個道理給中高層人員尤其合用。

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【etnet 30周年】多重慶祝活動一浪接一浪，好禮連環賞！ ► 即睇詳情