【細數5大偏門app】突圍而出還是名留青「屎」？

　　近年好多人都想藉著搞app撈返一筆，但市面真係太多app，行「正路」有時好難同人鬥，所以早年開始就多咗好多「偏門app」，希望以另一個玩法突圍而出。搞得好就叫突圍而出，但如果搞得唔好就會名留青「屎」。一齊嚟睇睇以下幾個app，古怪得嚟但又賺錢，浪費人生得嚟但又帶少少驚喜。

 

1. 「Nothing」

 

　　顧名思義，nothing就係nothing，就連個app icon都係nothing，乜都冇，得一個白色圖片，十分貼題。記得好多年前，第一個nothing app出現嘅時候，有好多人走去download，亦有用家留言讚好呢個app，睇落去真係好似好吸引。當你download後一開呢個app，就只會見到全白色嘅底色加上「Nothing」嘅字眼，冇任何掣，亦冇任何功能。佢仲有「Nothing Pro」嘅版本，只需大約$1美金就可以將Nothing升級，但其實Nothing Pro嘅背後就真係Nothing Pro，佢將本來「Nothing」嘅字眼變成「Nothing pro」。最神奇係，可能因為好奇心驅使，真係有非常多人download。可惜最後因為太多人投訴，所以被迫喺 iOS 下架，只剩返 android play有得download。而因為呢個app太簡單之餘亦有少少賺錢能力，所以之後好多app developer都寫咗類似嘅app，希望碰下運氣。

 

2. 「I am rich」

 

 

　　呢個app同「Nothing」其實係有異曲同工之妙，用家「只需」約$400美金就可以享受一下做個有錢人嘅感覺。而呢個app嘅重點並唔係用個app果一刻，而係畀錢買app嘅果一刻，當你開app時，你會見到「I am very rich!!! I bought this app for $xxx」，完。奇就奇在，喺app store有好多個「I am rich」嘅app ，有啲app 嘅下載人次係超過10萬人次，如果呢10萬人次係真的話，以$400美金計算，呢個app就賺咗4000千萬美金，咁果間app公司就真係「I am rich」呀。

 

3. 「S.M.T.H」

 

 

　　對比起前兩個app，呢個app玩味性就重「好多」。「S.M.T.H」 意思係「send me to heaven」，首先你要開咗個app，然後將自己個手機大力向天拋，當然記得接返住個手機啦，而呢個app就能夠記錄你手機向上拋嘅高度，你亦可以叫埋朋友一齊玩，齊齊向死亡挑戰。如果你想換手機，或者你真係「I am rich」的話，不妨多玩幾次～

 

4. 「Poop log」

 

 

　　呢個app我覺得佢好似好有用，但又好似冇乜用，「Poop log」係一隻幫你記錄你大便嘅日記app。你除咗可以記低你大便嘅日期同時間之外，仲可以記埋份量、顏色、急切性、有冇血／黏液等，然後將你嘅便便分開幾大類型／顏色，你亦可以寫低大便notes同影相留念，最後佢仲有一個分析表，等你對自己嘅便便一目了然。但問題係，便便質素係基於好多原因，齋記錄個「屎樣」其實應該冇乜幫助。

 

5. 「Yo」

 

 

　　呢個app真係勁（最初果時），2014年4月推出時冇乜人睇好，但佢喺好短時間內已經有50萬下載人次，同年7月市值估計已經有5百萬至1千萬美金，亦引來基金注資。Yo係一個「一鍵式」嘅通訊app，介面十分簡單，得幾個掣。如果你朋友都有下載Yo 的話，只要按你朋友嘅名字，佢就會收到一個「Yo」嘅通知，而佢之後亦可以「Yo」返你，如是者大家Yo 來Yo 去。因為簡單易玩，而且以前好多黑人／「hip hop 友」好鍾意用個「Yo 」字，所以冒起得好快，好多人下載。之後因為佢儲到好大嘅database，所以市值先會咁高。

 

　　但可惜呢個app未能把握機會，喺最高峰嘅時候諗方法去延伸自己嘅生意，不論喺功能、內容、通訊模式，還是係收費等，所以冇乜突破。再者如果一個通訊app 只能局限用一個Yo 字，其實真係冇乜用，對用家嚟講最多只能帶來一時間嘅noise，而唔能夠帶比大家長遠嘅實用性。

 

　　一個好嘅marketing方案，有時候就係要「走別人唔走嘅路」。與其不停地喺同一個圈子內同人鬥品質高、鬥靚，倒不如同人鬥古怪，嚟一招出奇制勝，可能更加簡單直接。

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

《說說心理話》：講講常見年輕人理財問題！想「人有我有」？認可理財社工分享理財觀念小秘訣！► 即睇