【Marketing中層困局】好勤力咁OT都頂唔順，問題係乜？

　　做marketing，有返咁上下年資同地位，如果再係一味靠死衝，以為好勤力咁OT就叫做得好嘅話，你嘅付出同收獲未必成正比之餘，亦可能錯過好多身邊嘅人同事。

　　Louis三十有五，由出道marketing至今，都係拼命三郎，事事親力親為，所以做過咁多間公司都備受上司同事嘅愛戴。雖然如此，Louis冇一間公司做得長，大約每兩年就會轉一次工。佢每次轉工嘅原因其實差唔多，就係「頂唔順，好攰，要抖抖」。

　　上年，Louis總算喺新公司捱到一個Marketing Manager嘅銜頭，有兩個下屬幫佢手。身邊朋友都替佢高興，以為佢可以冇咁辛苦，享受一下生活。點知上個星期，佢又話考慮緊遞信。

　　「都唔知係咪我條命係咁，間間公司都要做到夜晚11、12點。」Louis同我呻。

　　「你唔係有兩個細嘅幫你手咩？」我好奇問。

　　「你唔知架啦，佢哋做啲嘢唔係好得，所以我成日都要同佢哋double check。有時我又忍唔住，自己攞返嚟做，快啲嘛。」Louis自己一下道出OT原因。 

　　升上Manager，學懂放手，俾下屬一個機會獨立工作、成長，亦係俾緊機會自己學懂管理。有下屬幫手可以釋放你更多工作時間，做一啲Manager應該要做嘅事，例如從宏觀角度去做策劃，處理一啲OT都未必解決到嘅問題。

　　成日都話一個人對份工嘅熱誠就仿如一條能量棒，時有高低起伏。能量棒高時，你會對份工好有熱誠，好想做好每一件事。出現呢種情況好可能係因為啱啱升職、加咗人工、得到老細嘅讚賞，或者你有一班好好嘅同事，士氣超高，就算OT，一大班人都仲好開心。

　　但當你喺工作上面對跑數壓力、日日做到凌晨先搭的士返屋企、年尾加薪只得500蚊，又或者OT緊嘅時候，老細串你做嘢手腳慢時，你嘅能量棒可能會跌至谷低，同時亦係你萌起遞信辭職嘅時候。

　　「你升咗做Manager，就好應該做好管理下屬嘅工作，而唔係做埋下屬嘅工作。你不如放下假，幫自己叉下電啦。如果唔係，好難捱多十幾二十年喎。」我同Louis講。