相處怎只是大家性格上夾不夾，處理感情的手法也該一致。

　　「我見你好少將感情放上網？」她問。

　　「網上公開？我唔會架喎。」我笑了笑。

　　「呢排因為呢樣嘢同佢嘈……佢覺得人地拍拖都放上網，我唔咁做，唔似拍拖囉。」她反著白眼。

　　「放咗先似拍拖？」我不認同放閃。

　　以為放閃多半是女人行徑麼？錯，我聽過不少例子是男方要求女友網上放合照、禮物相、寫段肉麻文字……要曬才代表愛，代表拍拖ing？

　　「佢問我點解唔放。」

　　「唔放就唔放，仲要解釋...。」我沒好氣，反正我就是不會。

　　網上看太多放閃文，「黐頭芒」照片、貴重禮物曬圖、親嘴擁吻照、百字愛的宣言都有人放，每次看到都當花生碌過。別人拍拖放閃，要跟風嗎？頭一兩段感情，我也曾高調地公開，在FB轉status、IG定期轉貼頭合照、收花收禮物的感謝文，但就那幾次而已，其後都轉為低調，不說不放不多提。原因不只是換男友速度快，哈，分合幾次後，根本不想稍有動靜就透過網路在朋友圈中廣傳。人大了想保留點私隱，拍拖進程不用外界關心，可以吧！

　　她的狀況我也遇過，身邊曾有個ex同樣愛管閒事，基本都要平時查勤，報告行蹤，就連玩個Facebook、IG，他都要管，多次逼著我網上放閃，對話聽多了：

「點解我送俾你嘅嘢唔放上FB？」

「你IG無我地合照？」

「你啲朋友知唔知我地一齊？」

「Profile picture轉我地合照囉！」

　　後來他敏感性抓狂症發作就聽得更多：

「IG完全無我地嘅嘢，你驚邊個知？」

「你係咪有第二個，先唔敢公開關係？」

「你放我地合照上去再tag我，證明你無其他男朋友呀！」這句話令我最無言。

　　他有他訓話，我有我堅拒網上公開放閃。隨著他的幼稚要求和猜疑日益漸多，很快我便受不了，踢他出局。

　　在社交平台上，感情有多真實？曬愛不等如真恩愛，認識好幾對特別愛放閃光彈的情侶，人前人卻後兩個樣，各有各曖昧、偷食……演出來的戲碼只為形象啊！

    放閃能買到安心麼？表面的事，想做才做吧，別煩，別執著啦。