6歲入廚之路

　　許多人都知道這位年少有成的演員，舞台生涯由19歲開始，由無心插柳，誤闖舞台劇，一恍神十多個年頭。不過，原來他對煮菜早已產生興趣，入廚之路，原來要由6歲談起。

　　那位帶他走入廚房，教曉他一門好手藝的人，正是自小「湊」大他和弟弟的婆婆。「細細個婆婆就教我煮飯，初初都係切切洗洗咁，慢慢加啲加啲，開火、調味，最終極就係擔起成餐團年飯！」細路哥個個喜歡玩，廚房又熱又焗，如此乖巧，不過是想減輕年紀漸大的婆婆的擔子，後來興趣漸濃，開始變玩出自己獨門食譜，自此踏上煮飯仔之路。

演戲與煮菜 = 愛與分享的延伸

　　身兼演員與廚師，他笑說，兩者於他沒有太大分別，回歸基本步，都是關於愛和分享。「劇場係用藝術方式進行提問嘅地方，幫助觀眾思考愛、追尋人生嘅答案，刺激精神向前行，而演員正是講故仔嘅人」。

　　至於煮菜，他認為一定要同大伙兒分享才有意義，「食物唔止用來填肚，帶來嘅更係與朋友分享快樂嘅珍惜時光。」有麝自然香，後來身邊朋友將他的得意作品留影，擺上社交網站，搭上搭，便開始有人找他出書，今次推出的新書《祖堯廚房》是他第4本作品，由前菜、主菜，到大夥兒分享的派對小吃和甜品，一應俱全，足有101款咁多。「其實我做嘅工夫不算多，主要係選我嘅心水或者最多人like嘅食譜再出版」，背後推動出版的主要動力，是為了慈善：「我以前跟過奧比斯去孟加拉，睇過佢地幫當地盲人做手術，當地資源貧乏，吹沙入眼發炎，已經會搞到青光眼，死亡率高達一半！」也因此，他這次把版税收益，全數捐贈奧比斯作救盲用途，將愛延伸更遠。