其實我幾鍾意餐廳名夠直接的，例如日本放題叫「番本」，雖然好似爛左少少...... 

　　話說之前好友 Roland 生日，朕就做東請他到「魚吧」吃飯。話明叫「魚吧」，嚟到就梗係食魚啦，夠直接！

　　餐廳在 7/F 泳池旁邊，甚有度假feel，景觀是不錯，但因為中門大開及有戶外的部分，感覺上冷氣不夠，吃得有點兒熱。

 　　先來杯「Mojito」$98 解解熱：

　　在 bar 枱的位置已經見到有一系列的魚及海鮮，有即開生蠔，「魚蝦蟹」齊晒，可以唔使玩「大細」。

　　侍應有禮地向我們介紹 Fish of the Day，有冰鮮有活魚，並且會細心解釋每一種的烹調方法，例如冰鮮魚比較適合炸，活魚則可以用來煎，細心。

　　先來個「Baby Spinach Salad」$160

　　新鮮菠菜葉，配上紅菜頭、希臘羊奶芝士、用糖焗過的合桃及油醋汁，相當醒胃；尤其芝士鹹，合桃甜，菜頭腍，菠菜爽，整體是一個口感豐富的組合，相信連「菠菜蓮」都會讚好。

「Crab and Lobster Cake with Fish Bar Tartar Sauce」$170

　　是這裏的大熱菜式，非吃不可。兩大件厚蟹餅，約有我的掌心的大小，甚巨型。

　　一切開，裏面全部都是蟹肉及龍蝦肉，多得誇張！一般通常吃蟹餅都會沾他他醬，我覺得吃這個可以不用沾任何醬，要好好品嚐它的鮮味才是王道，而且最重要是它沒有令人討厭的蟹殼碎，真的是啖啖肉。我覺得可以考慮將它用來做漢堡包，效果應該會不錯，夠霸氣。

「Blackened Red Snapper」$280

　　這晚侍應推薦了 Red Snapper，我們挑選了加辣 pan fried，別看它烏卒卒，好似好似一隻黑蟋蟀。其實這是魚皮表面是塗了醬汁，及煎後的焦脆效果。

　　魚肉本身靚，已經贏在起跑線上。肉質滑溜，完全不腥，魚皮脆口，絕對不是省油的燈。再加上薯條及三款配菜 side dish，真的是非常飽！

　　本來壽星仔想吃雪糕，可惜這裏甜品選擇不算多，最出名的炸雪糕我們又不想吃，加上實在非常飽，唯有放棄了甜品環節。其實這裏的食物出品的確不錯，價錢又公道，以五星級的酒店來說，我覺得是一個相當不錯的選擇。

　　寫完呢篇文，從頭睇一次，先知原來寫咗咁多爛gag！ 

「魚吧 Fish Bar and Grill」

地址 : 金鐘金鐘道88號太古廣場香港JW萬豪酒店7樓平台

電話 : 2810 8366