建制盤口：林鄭最少700票

　　特首選舉三隻馬入晒閘，最矚目嘅，當然係林鄭月娥有幾咁「狂風掃落葉」式嘅去搶提名票。

　　早兩個星期，Tina已經預告，西環為林鄭預備咗一支「救火隊」，呢班隊員個個係忠義之士，一條心咁撐阿爺心目中嘅人選。依家睇返林鄭最終交上去嘅只係得580張提名票，600張都唔夠（Tina初時估計會有600多少少票數入閘），再扣埋胡官加曾俊華嘅345票，以及葉劉持有嘅票數，即係仲有約250人係無交提名。

　　Tina同親西環人士打聽過，呢批250人之中，相信最少一半，可能有達到150人，係收到西環嘅「柯打」，要佢地唔交提名票，準備喺正式投票時全部推晒畀林鄭，以抵銷可能會過票畀曾俊華嘅影響。

　　而據聞，西環已經定下一個「邀功指標」。如果林鄭能夠得到超過730票當選，將視為係大捷，將會犒賞三軍；如果得到超過700票都算係同中央有所交代，應該都會有打賞；萬一被施咒嘅號碼「689」都得唔到，極有可能會加重影響林鄭日後嘅管治威信，更遑論能夠團結返建制派，視之為小敗；敗得最羞家嘅，當然就係連600票都無，仲要由曾俊華贏到選舉。

　　不過呢位親西環人士就對林鄭以及「扣票」策略非常有信心，仲話唔少建制都私底下開盤口，賭林鄭以超過700票當選，竟然無人肯下注買「下盤」。所以一眾建制都相信，林鄭超過700票嘅勝算相當高。

　　今日曾俊華接受媒體訪問時就話，自己選得就無諗過輸，仲話「鐵票都可以熔」，會逐一去拜訪選委。但實情就係，曾俊華一向當正依家係「一人一票」選特首咁行超級親民路線，喺1194小圈子特首選舉，究竟可以起到幾大嘅火力去熔咗啲鐵票呢？