【山竹過後】他還值得你跟隨嗎？用一場颱風看清腦細的真面目

TEXT:Yan Law

19/09/2018

　　早幾日強颱風「山竹」襲港，各區因而遭受嚴重破壞。雖然星期一朝早落咗「8號波」，但由於街外仍然一片狼藉，最終搞到巴士停駛，港鐵亦只能有限度咁提供服務。而最慘嘅就莫過於一班打工仔，明明一早就起身出門口返工，但偏偏等車等咗兩三個鐘，途中仲有可能被腦細催問「返到邊？點解未見人？」真係諗起都覺得一肚冤屈無路訴！

　　不過亦有打工仔遇著個好腦細，一早就被通知可以home office，唔駛嘥時間同人逼港鐵，認真羨慕死人！所以小編就特意上網搜索了一下，希望可以從各大網友身上了解下唔同腦細會有咩唔同嘅颱風後復工安排，仲將佢哋嘅反應分咗正負兩面共6個級別，由好腦細代表嘅「＋Level 3」，講到衰腦細代表嘅「－Level 3」！

　　仲唔即刻睇下你腦細屬於邊個級別，然後再認真諗下，咁樣嘅腦細究竟值唔值得你（賣命）跟隨？

　　首先梗係畀大家睇下咩叫好腦細先啦！

（＋Level 3）

　　好腦細一定識得體恤員工嘅難處，男神古天樂絕對係其中一個好例子！出名有善心嘅佢，原來唔單只好落力做善事，仲好愛錫員工。正因為佢考慮到喺惡劣環境下返工嘅安全問題，所以佢決定畀員工home office，因而被網友大讚佢係「體恤員工嘅良心老闆」！

　　好腦細唔只得一個嘅。近年開網台做老闆嘅杜汶澤，亦有喺佢嘅個人Facebook度留言：「我決定今日公司所有人唔準返工！返工即炒！講完！」從來只有唔返工嘅打工仔先會被腦細炒魷魚，無論杜汶澤今次係咪講得誇張咗，但呢位人兄絕對係史上最霸氣嘅腦細之一。

（杜汶澤 Facebook截圖）

（＋Level 2）

　　喺巴士停駛嘅情況下，絕大部分打工仔都只能夠選擇搭港鐵返工，偏偏東鐵線受到「山竹」嘅破壞，只能夠局部通車，最終令大圍站、沙田站出現千人排隊嘅「空前盛況」。當你排緊喺一條見唔到頭又見唔到尾嘅長隊伍嗰陣，如果忽然收到腦細一句「返到就返，返唔到就算」嘅體貼安排，絕對會係你當日嘅最大福音。

（Facebook截圖）

（＋Level 1）

　　星期一瞓醒，知道「8號波」落咗，心入面已經萬分不願咁起身準備返工，點知竟然同時收到巴士停駛嘅噩耗！點算好？雖然有種腦細唔會好似「＋Level 3腦細」咁一開口就叫員工唔駛返工咁霸氣，不過願意提供交通補貼嘅佢哋都係幾抵讚嘅！

（Facebook截圖）

　　衰腦細係點？睇埋落去你就知！

（－Level 1）

　　雖然返工係打工仔嘅責任，「8號波」落埋山就更加冇埋唔返工嘅理由！不過今次「山竹」所造成嘅破壞非常驚人，唔單只發生多宗塌樹、塌棚架、車輛被吹翻嘅情況，就連巴士都宣布停駛！喺咁嘅情況下，腦細嘅不聞不問絕對都係一宗罪！

（原相：Poppy Wong　製圖：Lam Ching Ho）

（－Level 2）

　　不聞不問都算，更離譜嘅係，竟然有腦細叫員工「世界末日都要返」，真係好冇人性！雖然呢個腦細都可能只係得把口講下，不過喺呢個「民怨四起」嘅時刻，呢句說話絕對係難聽過粗口！

（Facebook截圖）

（－Level 3）

　　但最激起「民憤」嘅，一定係有腦細話要「執正嚟做」，話如果員工冇辦法喺中午12點前返到公司，就會當「礦工」（曠工）處理，而且仲要收書面警告。諗住請病假可以過骨？點知腦細就話要按正常程序，喺當值時間前至少兩個鐘前請假，如果唔係就會當遲call sick處理，一樣要收口頭警告，唔怪得有唔少網民都大鬧呢位腦細係「極權公司賣豬仔」！