呢兩星期，香港人睇住中共炮製嘅死亡直播，看到心寒、看到無力、看到麻木。似乎，佢哋已經贏咗。

　　先係睇住一個政權如何殺死一個人，然後仲要大義凜然地對外宣稱已經給予呢個人最好嘅治療。劉曉波嘅被殺直播，由一條又一條剪輯片段構成，包括「治療」片段、大肆剪輯嘅「中外醫療專家會議」片段、劉霞被告知政府嘅「治療」進度片段等等。死亡直播都未夠，屍骨尚未寒，中共就急不及待毀滅劉曉波嘅肉身，又將已經走入建制嘅劉曉波兄長放上枱面，營造劉曉波親屬都「感謝黨」嘅正面形象。

　　如果唔知道劉曉波係被囚禁嘅政治犯的話，望見一條又一條「全力搶救」嘅片段，話唔定會以為劉曉波對中共而言猶如領導人級別，需要將劉先生最後嘅時光好好記錄下來。但中共當然唔係咁諗啦，佢係想透過呢一啲片段，對劉曉波作最後嘅侮辱，同時塞住所有劉曉波先生支持者嘅口，杜絕一切「中共殺人」嘅指控。劉霞幾年前的一句話：「我覺得卡夫卡都寫不出比這更荒誕、更不可思議的東西。」為這一個月以來，發生在她的另一半，和她身上的種種事端，留下最準確的註腳。

　　看完政權如何殺死一個人，香港人就再看著政權如何殺死一個制度，而且再補上多刀。「人大僭法」 大獲全勝，繼「港毒」梁游之後，再多四名「眼中釘」落鑊，被取消立法會議員資格。在判決前如何「尊重法治」的人，在判決出爐之後都開始懷疑，香港人所珍重的法治還存在嗎？法庭還可信嗎？立法會還是不是一個值得留戀的「戰場」呢？唔少人就跳出嚟嘲笑DQ6，又義正辭嚴地指責泛民「輸打贏要」，「你當初宣誓時唔玩嘢咪冇事囉，係你哋自己抵死咋嘛。」當中包括上咗岸嘅香港人，以及絕大部分已投誠嘅中國香港人，甚至，係有一啲當初支持泛民嘅人，都覺得係咁。

　　聽見呢啲講法，對香港仲可以有啲咩盼望？

　　原來過咗8個月，真係有咁多人唔記得咗，宣誓相關嘅法例，唔係而家呢個模樣，傾向北京陣營嘅法律學者陳弘毅都唔能夠保持沉默，指出對後來被DQ嘅4位議員，法庭判決可能造成不公，因為根據「可預期原則」，佢哋係有理由相信，根據香港所行嘅普通法案例制度，只要讀齊誓言內每一粒字，就已經係接受及完成宣誓。陳弘毅無講嘅嗰句，其實就係人大唔係釋法，係修法、係大肆運用權力，為民主派嘅人度身訂造法律文本，提供DQ嘅基礎。佢哋就係知道，香港嘅法官一定要依從憲法制定嘅規矩判案，唔能夠好似大陸咁按政治需要判案。當「人大僭法」 後，守規矩嘅一方根本無任何走盞位置。

　　香港引以為傲嘅法律、制衡制度，自此一命嗚呼。

　　泛民又陷入一片爭論，究竟應唔應畀議會通過撥款、應唔應出嚟抗議、應唔應該上訴、應唔應該總辭……剩係呢啲爭論，都足以令泛民每一分政治能量被消滅，無人再有呼召力量，因為大家自此都要擔心，究竟做嘅任何一種行為，會否「令共產黨唔高興」。呢種心態，咪就係大陸民眾嘅心態？

　　無力感沉重。大家都變成要卑躬屈膝，求個政權唔好再傷害我哋，我哋仲可以做啲咩呢…？