月尾，等同糧尾。月尾出糧，何有糧尾之說？供樓、燈油火蠟、車費、飯錢……你懂的，打工仔的肩膀不是鐵做，要承受的洗費有很多。於是，想儲錢做自己喜歡的事，或是閒時買兩件心頭好，都變得非常奢侈。

　　「究竟份糧使咗去邊？」應該是打工仔每次望住戶口結餘會問的問題。解答前，不如先反問自己有無以下習慣？

　　- 邊行邊買的次數多過window shopping

　　- 頻頻出街食飯

　　- 見到平嘢即買（機票都計）

　　- 一心諗住上網睇正經嘢，最後變成瘋狂網購

　　- 喜歡追捧新科技產品

　　想儲錢不難，除了解自己的消費習慣外，同時問問自己︰

1/ 點解要儲錢？

　　大至買樓，小至買個模型公仔，儲錢總有一個目標。否則，為儲而儲的話，就好容易因為一時慾望而「一鋪清袋」。

2/ 每個月有邊幾種固定支出？

　　文章開頭有說明︰供樓、燈油火蠟、車費、飯錢，甚至家用，打工仔每月或多或少都有固定支出，儲錢前一定要計計自己仲剩幾多「底薪」。

3/ 想儲幾耐錢？

　　每個目標都總有死線，如果從未有計劃，即所有儲錢方法都是空談。建議最好將目標金額除開一年12個月甚至更長的時間，讓自己養成「應使則使」的良好習慣。

4/ 扣除固定支出後，要儲幾多？

　　下一步就要估算一下自己每個月究竟可以儲幾多錢。長有長儲，短有短儲，自己須分清緩急輕重，例如要追新電話，可能早幾個月就要「捱麵包」，但中長線的目標例如買樓，則有可能涉及與另一半的儲蓄大計。

5/ 有無加快儲錢嘅方法？

　　節流過後，更重要的是開源，事關儲錢都只是將份人工累積落去。你可能會話︰「最快，實係中六合彩。」但落返地少少，很多人會選擇金融投資，這當然不失為一個方法，但謹記要做好風險評估，避免因小失大，最後連少少都儲唔到。

　　可能你會覺得上述問題好廢，或者係人都知。但重點是，「知道點解、點樣儲錢」同「能否持之以恆去儲錢」，是兩碼子的事。