小編返咗工都唔係好耐，但眨下眼又到3、4月，咩意思？解釋番，此時此刻嘅準畢業生過埋呢個幾月，考埋final，就正式投身職場……這無盡旅途，被人鑑定你的醜惡與美好、低與高（對唔住，突然好想唱歌）。記得小編當初躊躇滿志，但同時又驚惶失措。無論如何，返人生第一份工，都一定係好有heart、好pure。所以好多人成日話返工頭幾年好重要，會唔會磨滅晒你啲passion，就係睇呢幾年。但作為新仔，無奈地有些事情不要不要還須做︰

1. 一切由filing開始

　　其實不論職級如何，都要做filing。但全公司嘅filing永遠係職場小薯負責做。話說有日腦細指一指我隔離張台上嘅一疊紙，然後同我講：「幫我搵一搵xx張單，轉頭畀我。」我默默咁行去個「廢墟」度，「亂咁擺嘅？」我心入面大鬧︰「你好嘢！」（just kidding）然後默默地將疊紙按字母順序由A至Z排，之後再跟日期排，最後用咗兩個鐘頭。第二日，腦細又叫我搵張單，我用咗2分鐘兼擺埋係佢枱頭。佢望一望我，可能心諗：「咦，我擺到咁亂你都摷得咁快嘅（自我FF緊）」。

2. Excel做report

　　Excel用途有幾多，返咗工一排嘅你定必有所感觸。小編返學時期都用過Excel做嘢5次（可能係幾年大學生涯加埋），其中4次都因為要做project。某日腦細行去我個位度，同我講：「你用尋日啲data整個table畀我。」然後佢就默默飄走咗。（心中在咆哮︰咩DATA！咩TABLE！腦細我唔知呀！）於是膽粗粗敲佢門，鼓起勇氣叫佢教我，然後我學識咗咩係Pivotal Table，咩係VLOOKUP。如果你都唔識，唔使驚，因為返工要識嘅嘢，學校課程係絕對唔會教到的。如果唔係返工仲有咩學？

3. 寄件同埋寄件

　　勞力工作正常都由小薯仔負責，例如寄件。雖然未必日日有件寄，但有時腦細總會好急咁講：「而家幫我拎去xx公司，立即RIGHT NOW。」（重唔重要佢都講3次）收到後，小編即刻停晒手頭上所有嘢（無錯，係所有嘢），之後拎起自己嘅包袱，朝著一個未知地，尋找我要去嘅公司。其實寄件都幾好呀，咪當遊車河囉（自我安慰mode）。

　　每人總會有做薯仔嘅階段，打好基本功，咪可以上位囉。（應該係，除非唔係）

source:CTgoodjobs